«Свой стиль» зэгухьэныгъэм хэтхэм я къыкIэлъыкIуэ гъэлъэгъуэныгъэр Налшык къалэм, ХьэтIохъущокъуэм и хадэм ит розэхэм я хьэсэхэм деж къыщызэIуахащ. Абдеж щагъэлъэпIащ республикэм и сурэттеххэм я   клубым и зэпеуэм щытекIуахэр. 

Хабзэ зэрыхъуауэ, клубым хэтхэм я лэжьыгъэхэм я гъэлъэгъуэныгъэ гъэ къэси къызэрагъэпэщ. Абы ирагъэхьэлIащ сурэтыщIхэм жэуаплыныгъэ ин пылъу зызы­хуагъэхьэзыра мы зэхыхьэ гуапэри. Зэпеуэм нэхъыфIу къыщалъытащ Къарей Дегис, Татьянинэ Иринэ, Тайсаев ДжэбрэIил сымэ я лэжьыгъэхэр. 
«Свой стиль» клубыр къызэIузыха икIи абы и унафэщI ­Лукьяненкэ Иван къыщыпсалъэм къыхигъэщащ 2004 гъэ лъандэрэ я IуэхущIапIэр зэрылажьэр, къэпщытакIуэ гупым хэтхэм мы зэхьэзэхуэм къыхэжаныкIахэр щIыхь тхылъхэмрэ саугъэтхэмкIэ зэрагъэлъэпIар. Сурэттех Iэ­щIагъэм дихьэххэм абы чэнджэщ яритащ интернетым и ­Iэмалхэр къагъэсэбэпу я щIэныгъэм хагъэхъуэну, зэ­пеуэ зэмылIэужьыгъуэхэм я зэфIэкI щеплъыжыну. IэщIагъэм и щэхухэм я гугъу щищIым, Лукьяненкэ Иван жиIащ сурэт-тех гъуазджэм дихьэхын, дахагъэр зыхащIэн, шыIэ яхэлъын зэрыхуейр.
- БгъэIэпхъуэ хъу мы ди гъэлъэгъуэныгъэм зы махуэм ­къриубыдэу цIыхушхуэ еплъащ, тхьэмахуитIым и кIуэцIкIэ музейм къекIуэлIахэм я бжыгъэм ебэкIыу. Къинэмы­щIауэ, къалэдэсхэмрэ республикэм и хьэщIэхэмрэ даIущIэну, депсэлъэну Iэмал диIащ, - жеIэ Лукьяненкэ Иван. - Ди клубым хэтхэр къэралым и нэгъуэщI фотоклубхэми хэтщ, урысейпсо, дунейпсо зэпеуэхэм щытокIуэ, семинархэмрэ сурэттеххэм я зэхыхьэхэмрэ жыджэру зыкъыщагъэлъагъуэ. Гуапэщ ди лэжьыгъэхэм гулъытэ зэры­хуа-щIыр, дахагъэм щIэупщIэ зэриIэр. Мы IэщIагъэр къыхэзыхахэр зэпымыууэ лэжьэн хуейщ, Къэбэрдей-Балъкъэрым  и дахагъэм псори драгъэхьэхыу. Сурэт техыным дихьэх щIалэгъуалэр утыку къихьэнымкIэ, ахэр щIыналъэм къыщацIыхунымкIэ клубыр дэIэпыкъуэгъу мэхъу. Мыпхуэдэ зэхьэзэхуэхэр къыщIызэдгъэпэщыр ди клубым сурэттех ­нэхъыбэ къыхэтшэн папщIэщ. 
Гъэлъэгъуэныгъэм хагъэхьа лэжьыгъэхэр зытеухуа и лъэныкъуэкIэ куэду зэщхьэщыкIырт, натюрмотртхэр,  гъэм и  зэманхэм  я  теплъэхэр,  псом  хуэмыдэу нэхъыбэм яфIэфI, дунейм и щIэрэщIэгъуэ гъатхэмрэ гъэмахуэмрэ къыщыгъэлъэгъуахэр, цIыху сурэтхэр, щIыуэпсыр, къалэхэр, тхыдэмрэ нобэрей гъащIэмрэ къызэщIаубыдэу. Мы сурэт щхъуэкIэплъыкIэхэм жыг хадэ зыгъэпсэхупIэм ущеплъыну, дауи, куэдкIэ нэхъ щIэщыгъуэщ.
БгъэIэпхъуэ хъу гъэлъэгъуэныгъэхэр гъэм и сыт хуэдэ зэманми къалэ паркым къыщызэрагъэпэщыр, лэжьыгъэ­щIэхэм цIыхухэр хагъэгъуазэу. Фотоклубым хэтхэм я ­лэ­жьыгъэхэр зэрагъэлъагъуэм и фIыгъэкIэ куэдым ­къацIыхуащи, абы хыхьэну гупыж зыщIхэм я бжыгъэм ­к­ъы­хохъуэ,  сурэтыщI   гъуазджэм  щIыналъэм зыщиу­жьы­нымкIэ сэбэп мэхъу. ЗэфIэкI зиIэ сурэттеххэм я Iэдакъэ­щIэкIхэм щIэупщIэ яIэ зэрыхъуари наIуэщ. Клубым хэтхэм я  сурэтхэр кIуэ пэтми нэхъыфI, нэхъ щIэщыгъуэ зэры­хъурщ абы и щхьэусыгъуэри. Гъэлъэгъуэныгъэм гъэ къэс къе­кIуалIэ цIыху нэфIэгуфIэхэм лэжьыгъэхэр ягу зэ­рыдыхьэм ахэр нэхъри трегъэгушхуэ. ЦIыхухэм яфIэгъэ­щIэгъуэнщ ягу дыхьа сурэтхэр зэрытраха щIыкIэр, ахэр щытраха щIыпIэм узэрыкIуэ хъунур, нэгъуэщIхэри. 
Мы Iуэху дахэм я гуапэу хэтащ сурэттех гъуазджэм дихьэххэр, Налшык къалэм и хьэщIэхэр, сурэттеххэм я благъэхэр, ныбжьэгъухэр.
 ТЕКIУЖЬ Заретэ.