КъБР-м щыIэ МВД-м ­щагъэлъэпIащ сабийхэм твор­чествэмкIэ я урысей­псо зэпеуэм, «Полицейский дядя Стёпа» фIэщыгъэр зезыхьэм, и республикэ Iыхьэм щытекIуахэр. 

Саугъэтхэмрэ фэеплъ тыгъэхэмрэ текIуахэм Iэ­щIа­лъ­хьащ къэрал кIуэцI Iуэху­хэмкIэ министру КъБР-м щыIэм и къуэдзэ Бахъуэ Аслъэнрэ ведомствэм дэлажьэ Жылагъуэ советым и тхьэмадэ Мэкъушэ Русланрэ.
«Полицейский дядя Стё­па»-р - ар зэхьэзэхуэ къудейкъым. АтIэ, ди ныбжьыщIэ лъапIэхэ, полицэм и лэжьыгъэр зищIысыр нэхъыфIу къэфщIэнымкIэ, ди къулыкъум мыхьэнэшхуэ зэриIэм­рэ жэуаплыныгъэшхуэ зэры­пылъымрэ къывгурыIуэ­нымкIэ Iэмалщ. Абы фэ екIуу фыпэлъэщащ! Фи лэ­жьыгъэхэм къыхощ хабзэм и хъумакIуэхэм ткIиягъ къы­зэрыддэфлъагъум и мызакъуэу, гуапагъэ зыхэлъ дэ­Iэпыкъуэгъухэу, сыт хуэдэ дакъикъэми щIэгъэкъуэн ­дыхъуну дыхьэзыру къэв­гъэлъэгъуащ», - жиIащ Бахъуэ Аслъэн. 
Зэпеуэм къагъэхьат республикэм и щIыпIэ псоми къи­кIа лэжьыгъэ 30-м ­щIигъу. Абыхэм хэплъэри, я ныбжь елъытауэ текIуахэр ягъэнэIуащ.
Илъэси 6 - 8-м хиубыдэхэм я деж япэ увыпIэр къыщихьащ Тырныауз къалэм и лицей №1-м щеджэ Джубуев Али-СулътIан.
Сэрмакъ къуажэм и курыт еджапIэм щыщ БатI Дисанэ и IэдакъэщIэкIыр илъэси   9 - 11 ныбжьым итхэм я деж лэжьыгъэ нэхъы­фIу къыщалъытащ. 
Чеченов С.С. и цIэр зе­зыхьэ курыт еджапIэм щыщ Бозиев Малик илъэс 12 – 14 хъухэм я деж щытекIуащ. 
«Еплъахэм нэхъ ягу ирихьар» дамыгъэ хэхар хуа­гъэфэщащ Шэджэм къалэм и СОШ №5-м щеджэ Беслъэней Имирлан.
Мэкъушэ Руслан текIуахэм яжриIащ здынэсам къы­щы­мыувыIэу я ехъулIэныгъэ­хэм адэкIэ пащэну, заужьыну, я хъуэпсапIэхэм хуэкIуэну икIи къыхигъэщащ хабзэ­хъу­мэ органхэм я тхыдэм езыхэми хэлъхьэныгъэ хуа­щIыну зэращыгугъыр. 
ЗэIущIэ гуапэм и кIэухыу министрым и къуэдзэр текIуа ныбжьыщIэхэм ехъуэхъуащ узыншагъэ быдэ яIэну, я гъэмахуэ зыгъэпсэху­гъуэр­ екIуу ягъэкIуэну. ЗэIущIэр иухащ зэщIыгъуу ­фэ­еплъ сурэтхэр зыт­ре­гъэ­хынымкIэ. 
ДЫГУЛЫБГЪУ Жануэс.