Кёп болмай Элбрус районда «Россейни кючю халкъланы бирлешгенлериндеди, Россейни ариулугъу орус тилдеди» деген ат бла кёлденжазмаланы эришиую бардырылгъанды. Анда тамата классланы къауумуну арасында биринчи жерге уа Лашкутаны онбиринчи классыны окъуучусу Тилланы Фатима чыкъгъанды. Аны конкурсха хазырлагъан а орус тилден бла литературадан устазы эмда класс башчысы Гюлюйланы Зухурады.
Фатима биринчи классдан да «бешлеге» окъугъан сабийди. Окъуугъа-билимге талпыннганы бла бирге уа, ариу къылыкълыды, адетлиди. «Анга не жумушну буюрсанг да, ол аны тынгылы тамамларыгъын билесе. Жууаплылыкъны сезген къызчыкъды. Ата-анасына да аны алай юйретгенлерине ыспас этеме», – дейди аны юсюнден Зухура Алиевна.
Эндиге дери да хунерли окъуучуну жетишимлери асламдыла, олимпиадалагъа, башха-башха эришиулеге къатыша, билим алгъан мектебини даражасын кётюргенлей  тургъанды. Сёз ючюн, былтыр а ол «Бизни жигитлерибиз» атлы эришиуге да орус тилден кёлденжазма хазырлагъанды. Анда да къызчыкъ хорламгъа тийишли болгъанды. Бу конкурс а республика даражада бардырылгъан эди. Кёлденжазманы уа Фатима СВО-да жан берген жашларыбыздан бири Уяналаны Асадны жигитлигини юсюнден жазгъанды. 
Биз ишни юсю бла Лашкутада болгъан  кюнде уа бу кёлденжазманы дерсде окъугъанларында эшитирге да тюшген эди. Былайда сабийни, аны устазыны да билимлерин чертирге тийишлиди. Анда адам улу уруш къыйынлыкъгъа налат бере, мамырлыкъгъа талпына, аны сакъларгъа итине келгенини, Асад кибик, Ата журтуна, аны ниетлерине, къыйматларына кертичилей къалгъан уланларыбыз бола  келгенлерини юсюнден да айтылгъан эди.
Андан сора да, былтыр «Мен Россейге къуллукъ этеме» деген кёлденжазмала эришиуде биринчи болгъанды Фатима. Орус тилден, математикадан конкурслагъа, илму конференциялагъа къатыша, хунерин-билимин ачыкълагъаны бла бирге жетишимли болгъанлай келеди.
Биз Фатиманы, белгилегенибизча, мектепде къонакъда болгъаныбызда кесибиз да кёрген эдик. Ол ана тилге жораланнган фестивальны школда бардырылыууна къошумчулукъ этген окъуучуладан бири болгъанды. Аны тауча сёлешгени, назмуну окъугъаны, къонакълагъа кёрмючде салыннган хар нени юсюнден тынгылы билдириу этгени да айырмалы эди. Эллерибизде быллай сабийле ёсгенлери уа бизни, айхай да, хар заманда да кёллендиргенлей турады.
Дерследен тышында уа, ол миллет тепсеулени кружогуна жюрюгенди. Мектепде эм сюйген дерслеринден бири орус тил болгъанды. Энди бюгюнлюкде уа, белгилегенибизча, къызчыкъ мектепни бошап, Бир къырал сынаулагъа хазырлана турады. Медицина факультетде билим алып, врач болур муратдады. Бу жаны бла уа анга юйюрде юлгю болур адамлары бардыла, ала районда, республикада да саулукъ сакълаугъа къошумчулукъ этгендиле, кёплени жарсыуларына жарай келедиле. Фатима уа быллай усталыкъны сайлагъанла артда жашауда ишсиз къалмазлыкъларына, жамауатдан ыспас алырларына эмда жетишимли болурларына да ышанады.
Къайсы сабийни да жетишими, жаланда аны кесини  хунерин, билимин баямлау бла байламлы жумуш болуп къалмай, ол окъугъан мектепни, аны юйретген устазланы да даражаларыды, педагогла къалай ишлегенлерин,  ёсюп келгенлеге  къаллай билим бергенлерин ачыкълагъан шартды. Алай эсе уа, эллерибизде юлгюге, махтаугъа да тийишли бола ишлегенлерибиз, окъугъанларыбыз да халкъыбызны тамбласын айнытырыкъ адамларыбыздыла.

Трамланы Зухура.