Малкэ къуажэм ЩэнхабзэмкIэ и унэм щекIуэкIащ «ТекIуэныгъэм дыхуэзыша уэрэдхэр» пшыхьыр, 1941-1945 гъэхэм екIуэ­кIа Хэку зауэшхуэм ТекIуэныгъэ Иныр къызэрыщытхьрэ мы гъэм илъэс 81-зэрырикъум и щIыхькIэ къызэрагъэ­пэщар. 

Ар къызэIуахащ Урысей Федерацэм и гимнымкIэ. Зауэ губгъуэм щауса уэрэдхэм къарууэ ящIэлъам, ахэр тхыдэ напэ­кIуэцI­хэм игъащIэкIэ къызэрыхэнам, уэрэдхэм ягъэгушхуа зауэлIхэр абы псэзэ­пылъ­хьэпIэм къыщриша къызэрыхъуам щы­тепсэлъыхьащ пшыхьым. Дзэлыкъуэ щIыналъэм и уэрэджыIакIуэ ныбжьыщIэхэм ягъэдэхащ утыкур. Къамлыкъуэ, Сэрмакъ, Совхознэ, Псынэдахэ, Дзэлыкъуэкъуажэ ЩэнхабзэмкIэ я унэхэм я гъэсэнхэм, сабийхэр макъамэм щыхурагъаджэу райо­ным щыIэ IуэхущIапIэм екIуалIэ цIыкIухэм зыкъыщагъэлъэгъуащ мы зэхыхьэм. 
Нэхъыжьхэмрэ щIэблэмрэ я зэпыщIэныгъэм, жьыкIэфэкIэм я чэнджэщхэр сабийхэмрэ ныбжьыщIэхэмрэ папщIэ зэрыщ­хьэ­пэм, щIэблэ хэкупсэм зауэм теухуа уэ­рэд­хэр зэращIэм икIи зэрыжаIэм теп­сэлъыхьащ Малкэ къуажэм ЩэнхабзэмкIэ и унэм и лэжьакIуэ КIурашын Iэсият. 
- Абы щыгъуэ ди сэлэт хахуэхэм къахьащ ТекIуэныгъэр. Ди бгыр щIэткъузэн хуейщ ноби. Псалъэм и къарур зыщIэлъ мы уэ­рэдхэр жытIэху, дедэIуэху, дэ дылъэщщ, - къыхигъэщащ абы. 
Пшыхьым къыщыпсэлъащ Псынэдахэ къуажэм дэс бзылъхугъэхэм я зэгухьэныгъэм и унафэщI Сыжажэ Iэминат. Абы къы­хигъэщащ мы илъэсыр Лъэпкъхэм я зэкъуэтыныгъэм и гъэу зэрагъэувам къэ­ралым и цIыхухэр нэхъри дызэкъуэтыным дыкъыхуриджэу къызэрилъытэр. 
- ТекIуэныгъэ лъапIэр къазэуащ псоми зэщIыгъуу. Лъэпкъ зэныбжьэгъугъэрщ нэхъри лъэщ дызыщIыр, - жиIащ абы. 
Пшыхьыр зэхуащIыжащ «Мелодии детст­ва» сабий хорым игъэзэщIа уэрэдымкIэ. 

ГУГЪУЭТ Заремэ.