Къабарты-Малкъарда Китапны сюйгенлени обществосунда «Жанлары болгъан тизгинле» деген биригиу ишлейди. Бу кюнледе аны кезиулю жыйылыуу болгъанды.
Анда эки китапны юсюнден айтхандыла: «Комсомол Кабардино-Балкарии в лицах и фотодокументах», «Стройотряды – моя судьба: 105-летию комсомола Кабардино-Балкарии посвящается».
Китап окъуучула алада кесини эсгериулерин жазгъан Владимир Александрович Стёпин бла тюбешгендиле.
Жыйылыуну ишин башлай, Къабарты-Малкъарда Китапны сюйгенлени обществосуну таматасы Наталья Шинкарёва аны юсюнден къысха сёзюн айтханды. «Владимир Александровични битеу да жашауу бизни республика бла, Нальчик бла байламлыды. Ол мында туугъанды, ёсгенди, окъугъанды. Комсомолну иши бла не заманда да байламлы болгъанды. Урунуу жолун Нальчикде Станокла ишлеген заводда башлап, КъМР-ни оноучусуну, Правительствосуну аппаратыны протокол-басма ишлерин жюрютген бёлюмюнде таматагъа дери ёсгенди», - дегенди ол.
Ызы бла Владимир Александрович жыйылгъанлагъа кесини жаш заманыны, комсомолда ишлеген жылларыны юслеринден тынгылы хапар айтханды. «Манга комсомол бюгюн да озуп кетген заман тюйюлдю, ол мени бир кесегимди. Бу эки китапда ол кезиудеги жашауну юсюнден хапарлагъанбыз. Мен, ол заманны жангыдан сезип, жюрегим бла ётдюрюп, алай жазгъанма», – дегенди.
Аны Станокла ишлеген заводда 1980-1990 жыллада комсомол жашауну юсюнден хапары бир да сейир эди жыйылгъанлагъа. Артда ол къыйын жыллада да, башха идеологияны келе тургъан заманында, комсомолчула къыралны сейирлеринде жигер урунургъа талпыннгандыла. Владимир Александрович комсомолну ветеранлары бюгюн да республиканы жашаууна тири къатышханларын, не тюрлю ишде, болумда да Ата журтха сюймекликлерин дайым билдиргенлей тургъанларын белгилегенди.
Къурулушчу студент жыйынланы эсгере, ол: «Мен ол заманладагъы жаш адамланы, субботникледе болсун, къурулуш жыйынлада болсун, жаннган кёзлерин бир заманда да унутурукъ тюйюлме. Биз заводну ашханасында, базасында не болгъанына да тергеулю къарагъанбыз, билгенбиз. Жангы жарыкъ жашауну къурулушчуларыбыз деп, алай жашагъанбыз, хар кюнден игилик этерге, тюзлюкню жакъларгъа талпына. Комсомол школну ётгенле, кертиси бла да, республиканы тамалыдыла», – дегенди.
Хау, Владимир Александрович айтхан сёзледе жашау кертилик барды. Совет Союзну заманында комсомол таматалагъа андан ары ёсерге жол ачылгъанды. Аладан бир къаууму ишчи предприятиялада, маданиятда да уллу къуллукъла алгъандыла. Комсомол – юйренирге жол ачхан ахшы сынау эди.
Тюбешиуню ахырында, Владимир Александрович башлап, ары келгенле бирге комсомол жырланы жырлагъандыла.
Адам алай къуралгъанды, баям: жаш заманына къайтыргъа, аны юсюнден хапар айтыргъа сюеди жашай баргъаны къадар. Ол кюн тюбешиуге келгенле, комсомол жылларын эсгерип, озгъан жашлыкълары къалай къанатлы болгъанын жангыдан сезгендиле.
Наталья Петровна уа, бу жыйылыуну магъанасын белгилей, былай дегенди: «Быллай тюбешиуле жаланда бизге, эрттеги комсомолчулагъа угъай, жаш адамлагъа да бек керекдиле бюгюн. Нек дегенде ала аланы аппалары бла ынналары къалай жашагъанларын, неге ийнаннганларын, кеслеринден сора не къойгъанларын быллай кезиуледе ачыкъ кёрюрге боллукъдула».
Бу къууанчлы, сейир да тюбешиу, керти да, бизни республикада комсомолну тарыхы бош къагъытлада къалгъан жазыула бла чекленмегенин, аланы юслеринден жазылгъан тизгинлени жанлары болгъанын, алада ёмюрлени бирге байлагъан къадарла, жюрек жырла да жашагъанларын кёргюзтгенди.
Мусукаланы Сакинат.
