Накъыгъэм и 4-8-хэм Къэбэрдей-Балъкъэрым щекIуэкI Урысей-Абхъаз щIалэгъуалэ форумыр Налшык къалэм къыщызэIуахащ. Ар КъБР-м и Правительствэмрэ Абхъаз Республикэм ЩIалэгъуалэм я Iуэхухэмрэ спортымкIэ и къэрал комитетымрэ къызэрагъэпэщащ, УФ-м ЩIалэгъуалэм я IуэхухэмкIэ и федеральнэ агентствэмрэ Урысеймрэ Абхъазымрэ нэгъуэщI къэрал IуэхухэмкIэ я министерствэхэмрэ я дэIэпыкъуэгъуу. 

ХьэщIэхэр къызэрысу удз гъэ­гъа­хэр тралъхьащ Куржы-Абхъаз хэку зауэм хэкIуэдахэм я фэеплъым. Абыхэм ящIыгъуащ КъБР-м и Правительствэм и УнафэщIым и къуэдзэ Къуэшрокъуэ Залым, ­КъБР-м щIалэгъуалэм я IуэхухэмкIэ и министр Лу Азэмэт, КъБР-м лъэпкъ Iуэхухэмрэ жылагъуэ проектхэмкIэ и министрым и къуэдзэ Гергоков Джамбулэт, жылагъуэ, щэнхабзэ, щIэныгъэ лэжьакIуэ-хэр. Абхъаз Республикэм къикIа щIалэгъуали 150-м я пашэт АР-м и вице-премьер, ЩIалэгъуалэм я Iуэхухэмрэ спортымкIэ къэрал комитетым и унафэщI Хагбэ Тарас, къэрал къулыкъущIэхэр. 
Форумым и утыку нэхъыщхьэр ЩIалэгъуалэм я унэращ. Абдеж хьэщIэхэм къащыпэплъэрт адыгэ джэгу зэхэзыубла ди щIалэхэмрэ пщащэхэмрэ. Зэкъуэш щIыналъэхэм ис ныбжьыщIэхэр гуапэу зэIущIащ, махуэ зыбжанэкIэ зэ­ры­зэхэтынум щыгуфIыкIыу. Фору­мым хэтщ Адыгейм, Къэрэшей-Шэрджэсым, Осетие Ищхъэрэ-Аланием, Ингушым, Шэшэным, Дагъыстэным, Ставрополь крайм, Кърымым, Комим, Башкортостаным, Алтайм, Мордовием, Тэ­тэр­станым, ДНР-м, Пермь, Моск­ва, Калугэ, Ленинград, Астрахань, Запорожье, Омск, Орел, Свердловск, Тамбов, Челябинск областхэм, Москва, Севастополь ­къалэхэм къикIа лIыкIуэхэри. 
Зэхыхьэшхуэр гъэщIэгъуэн ящIырт лъэпкъ хьэпшыпхэр, шхы­ны­гъуэхэр, Iэмэпсымэхэр щы­зэ­хуэхьэса пщIантIэхэм, сурэ­тыщI­хэм, дизайнерхэм, IэпщIэлъап-щIэ­хэм, хьэрычэтыщIэхэм я зэ­фIэкIыр утыку къыщрахьэ плIа­нэ­пэхэм, университетхэмрэ ку­рыт IэщIагъэ щрагъэгъуэт ­еджапIэхэмрэ щекIуэкI лэжьыгъэр наIуэ къэзыщI утыкухэм, республикэм и щIыналъэхэм я псэу­кIэмрэ зыхуэкъулеймрэ къэ­зы­гъэ­лъагъуэ шэтырхэм.
КъэралитIым щыщ щIалэгъуалэ щэ бжыгъэр щызэхыхьа гуфIэгъуэ зэIущIэм кърихьэлIащ КъБР-м и Iэтащхьэ КIуэкIуэ Казбек. Аб­хъазым къикIа хьэщIэхэм я гъусэу республикэ унафэщIым зригъэлъэгъуащ егъэджэныгъэм, щэн­хабзэм, гъуазджэм, IT-технологием, экономикэм, псэукIэм ехьэлIа зыужьыныгъэм щIалэ­гъуа­лэм халъхьэфыр зыхуэдизыр. Абыхэм ятеухуа гъэлъэгъуэ­ныгъэр куэдым я дежкIэ щIэщыгъуэт. 
Ди къэралым щыщу ныбжьыщIи 150-рэ Абхъазым къикIауи апхуэдиз щызэхуэса зэIущIэр къызэIуихащ КъБР-м и Iэтащхьэм. 
- Сигуми си псэми къабгъэдэ­кIыу фыкъызогъэблъагъэ Къэ­бэрдей-Балъкъэрым. ПщIэшхуэ пылъщ мыхьэнэ ин зиIэ зэхыхьэр ди лъахэм зэрыщекIуэкIым, - жи­Iащ КIуэкIуэм. - ФIыщIэ яхуэс­щIыну сыхуейщ Урысей Федерацэм и Президент Путин Влади­миррэ Абхъаз Республикэм и ­Пре­зидент Гунбэ Бадрэрэ, ди ­жэр­­дэмыр къызэрыддаIыгъам ­папщIэ, апхуэдэуи къызэгъэпэ­щы­ныгъэ IуэхухэмкIэ къыддэIэпыкъуахэу УФ-м нэгъуэщI къэрал Iуэ­ху­хэмкIэ и министр Лавров Сергейрэ ЩIалэгъуалэм я IуэхухэмкIэ федеральнэ агентствэм и уна­фэщI Гуров Григорийрэ. Форумыр зыхуэунэтIар Урысеймрэ Аб­хъазымрэ я щIалэгъуалэм я зэпыщIэныгъэр гъэбыдэнырщ, ахэр унэтIынырщ, къыхалъхьэ проектхэмрэ жэрдэмхэмрэ зегъэужьынырщ, къэрал щIалэ­гъуалэ политикэм заузэщIыным яху­зэфIэкI хегъэлъхьэнырщ. Мыбы щаухуэну дыщогугъ зыуэ щыт гуманитар хъыбарегъащIэ утыку, ди лъэпкъ хабзэхэр, лъапIэныгъэ-хэр, хэкупсагъэр и лъабжьэу. Мы зэIущIэм Iуэхугъуэ куэд хэтщ ­щэнхабзэм, егъэджэныгъэм, узэ­щIыныгъэм хуэунэтIауэ. 
Ныбжьэгъу лъапIэхэ! Абхъаз Республикэр дэ куэд щIауэ дзыхь зыхуэтщI ди лэжьэгъущ, езы аб­хъазхэр ди къуэшщ, ди зэхущы­тыкIэм тхыдэр и лъабжьэщ, щэн­хабзэ зэпыщIэныгъэ быдэхэр ди зэхуаку дэлъщ, дяпэкIэ Iуэху­гъуэщIэхэр зэдэтщIэным дыхуо­паб­гъэ. БлэкIар дигу къэдгъэкIыж­мэ, Къэбэрдей-Балъкъэрым щыщу цIыху мин 55-м щIигъу хэтащ Хэку зауэшхуэм, абыхэм ящыщу мин 17-м къагъэзэжакъым, абыхэм я псэр щIатащ ди къэкIуэнум. Абхъаз хэку зауэм щыщIидзам Кавказ Ищхъэрэм ис лъэпкъхэр зылI и быну зэкъуэувэри, я къуэш­хэм зыщIагъэкъуащ. Абы лъандэрэ илъэс пщIы бжыгъэхэр ­дэ­кIыжами, езыхэм я фIэфIы- ныгъэкIэ Абхъазым щызэуахэр нобэ ди къэралым и щхьэ­хуи­тыныгъэр яхъумэу дзэ Iуэху хэхам хэтщ, абыхэм ящыщщ Урысейм къыгуэт «Пятнашка» бригадэ цIэрыIуэри. Дэ быдэу ди фIэщ мэхъу ТекIуэныгъэр ди Iэрылъхьэу Iуэхур зэриухынур, сыт щхьэкIэ жы­пIэмэ, дэ пэжым дрителъхьэщ. 
Урысеймрэ Абхъазымрэ я цIыхухэм, ди къэралхэм я зэныбжьэгъугъэ быдэм дригушхуэну ­хуитыныгъэ диIэщ дэ. Зы мазэ ипэкIэ Сыхъум къалэм щекIуэкIа Дунейпсо экономикэ форумым Iэ щыщIадзащ КъБР-м и Прави­тельствэмрэ Абхъазым и Прави­тельствэмрэ экономикэ, щIэныгъэ-техникэ, щэнхабзэ я лъэныкъуэкIэ зэдэлэжьэным теухуа ­зэгурыIуэныгъэм. Щхьэхуэу сы­къытеувыIэну сыхуейщ Абхъаз Республикэр социально-экономикэ зыужьыныгъэм и гъуэгум зэ­рытетым, и псэукIэм зэрызы­щиужьым. АР-м и Президентымрэ   къыдэлажьэхэмрэ ­но­бэ зэрахьэ  Iуэху  щIэкIэм  зыу­жьы­ныгъэш­хуэхэм зэрыхуишэнур си фIэщ мэхъу. Тхьэмахуэ ипэкIэ Кавказ инвестицэ зэхуэсышхуэм Iэ щы­традзащ Налшыкрэ Сы­хъумрэ я зэныбжэгъугъэм теухуа зэгу­ры­Iуэныгъэм. Фэ, щIалэгъуа­лэ жы­джэрым, ди зэкъуэшыныгъэр адэкIэ зэрывгъэкIуэтэнум,  ди зэ­ху­щытыкIэм и лъэбакъуэ­щIэ­хэр тхыдэм зэрыхэфтхэнум шэч къытесхьэркъым. Сынывохъуэхъу лэ­жьыгъэ купщIафIэ, ди лъэпкъхэм я дежкIэ щхьэпэ хъун Iуэху- хэр къывдэхъуну, Къэбэрдей-Балъ­къэ­рым щывгъэкIуэну махуэхэр фIыкIэ фигу къинэжыну. Мы зэ­хыхьэм къыпищэу фокIадэ мазэм Абхъазым щекIуэкIыну щIалэ­гъуалэ зэхуэсми УФ-мрэ ­АР-мрэ я зэдэлэжьэныгъэр адэкIэ зэригъэкIуэтэнур си фIэщ мэхъу, - жиIащ КIуэкIуэ Казбек. 
КъэпсэлъапIэр хуитI зыхуащIа Хагбэ Тарас Абхъаз Республикэм и Президент Гунбэ Бадрэ форумым хэтхэм зэрызахуигъазэм къеджащ. 
«ПщIэ зыхуэсщI Казбек Валерэ и къуэ, фIыщIэ ин пхузощI мып­хуэдэ зэхыхьэ гукъинэжыр Къэ­бэрей-Балъкъэрым щекIуэ­кIыныр къызэрызэвгъэпэщам щхьэкIэ. Псом япэ къыхэзгъэщыну сы­хуейщ ди къэралхэм, лъахэм я зэ­пыщIэныгъэр - нэхъ быдэ, ди щIалэгъуалэм я зэныбжьэгъугъэр нэхъ куу хъун щхьэкIэ пхузэфэкI къы­зэрумыгъанэр. Къызэхуэса псоми фIэхъус гуапэкIэ захузо­-гъа­зэ. Мыпхуэдэ зэIущIэхэрщ лъэпкъхэм я зэгурыIуэныгъэм, зэ­ныбжьэгъугъэм къежьапIэ хуэ­хъур. 
ДэркIэ мыхьэнэшхуэ иIэщ форумыр ди къуэш хэгъэгум и къа­лащхьэ Налшык зэрыщекIуэкIым. Ди лъэпкъхэр ижь-ижьыж лъандэрэ зэкъуэшым хуэдэу къызэдокIуэкI, ар зэманми, дызыхэта гу­гъуехьхэми хьэкъ ищIащ. А зэ­хущытыкIэр лIакъуэкIэрэ зэIэ- пытхыу апхуэдэщи, иджырей щIа­лэ­гъуалэми къыпащэну ди ­хъуэпсапIэщ. Абхъазыр гузэвэ­гъуэ щыхэхуам псом япэу къы­къуэувар Кавказ Ищхъэрэм щыщ ди къуэшхэрщ, абыхэм я дэIэ­пыкъуныгъэр ди щхьэхуитыныгъэм сэбэп хуэхъуащ. Иджы абы щыгъуэм къыткъуэувахэм я бынхэращ зэхуэсари, ди зэпыщIэныгъэм адэкIэ зевгъэужьыну фи пщэрылъщ, фи адэхэм ящIам хэвгъахъуэу фызэдэпсэумэ, абы нэхъ лъэрызехьэ дищIынущ». 
УФ-м нэгъуэщI къэрал IуэхухэмкIэ и министр Лавров Сергей ­къигъэхьа тхыгъэм къеджащ ­Федерацэм и субъектхэм, Парламентымрэ жылагъуэ зэгухьэ­ныгъэ­хэмрэ запыщIэнымкIэ департаментым и унафэщIым и ­къуэдзэ Кулагинэ Иринэ. Видеозэ­пы­щIэныгъэкIэ къызэхуэсахэм фIэхъус ярихащ «Росмолодежь» агентс­твэм и унафэщIым и къуэ­дзэ Литвиенкэ Егор.
Егъэджэныгъэм, щIэныгъэм, узыншагъэр хъумэнымкIэ IэнатIэм, туризмэм, спортым пэрыт IэщIагъэлI ныбжьыщIэхэр, студентхэр, хьэрычэтыщIэхэр, дзэ Iуэху хэхам хэтахэр щызэхуэса зэIущIэм щыщ зы Iыхьэщ япэ махуэм екIуэкIа гуп зэпсэлъэныгъэхэр. «Урысеймрэ Абхъазымрэ: щIалэгъуалэ Iуэ­хухэр» зи фIэщыгъэ Iыхьэм ­хыхьэу гупхэр щIэсащ: «Экономикэ Iэмалхэмрэ IэнатIэ зэгъэгъуэ­тынымрэ, Iэзагъым хэгъэ­хъуэ­ным­рэ хьэрычэтыщIэ Iуэхумрэ»; «Унагъуэ быдэ: демографие зыу­жьы­ныгъэм, социальнэ дэIэпыкъуныгъэм теухуауэ»; «Медиамрэ IT-мрэ»; «Дунейпсо щIалэгъуалэ зэ­­­дэлэ­жьэныгъэ»; «Кавказ бгъэ­­дыхьэкIэ гъэщIэгъуэнхэр: проект лъэ­рызехьэхэр»; «Зэкъуэтыныгъэм и къарур: егъэджэныгъэ, бзэ, щэнхабзэ лъэпкъ лъапIэны­гъэ­хэр» лекцэхэм, абыхэм къы­щып­сэ­лъащ урысей, абхъаз щIэ­ныгъэлIхэмрэ IэщIагъэлI­хэмрэ. 
Форумым хэтхэм Iуэхугъуэ гъэ­щIэгъуэн куэд къапоплъэ, ахэр Налшык къалэм и закъуэ мыхъуу, республикэм и щIыналъэхэм яшэнущ, абы щыIэ ЩIалэгъуалэ унэ­хэм щылэжьэнущ, я нэгу зрагъэужьынущ, я щIэныгъэми Iэзагъми зэрыхагъэхъуэн Iэмал куэд махуиплIым къриубыдэу къыху­зэрагъэпэщынущ.
Зэхыхьэм и япэ пшыхьыр гукъи­нэж ящIащ Абхъазым къикIа, Урысей Федерацэм, Къэбэрдей-Балъкъэрым щыщ уэрэджыIакIуэхэмрэ къэфа­кIуэ­хэмрэ.

ШэрIужь Даянэ. 
Сурэтхэр
Къарей Элинэ трихащ.