Нальчикде  Музыка театрда  Россейни бек белгили  Мариин  эм Уллу  театрларыны  артистлери симфония чыгъармаладан  концерт бергендиле. Ол жыйырма бешинчи юбилей Пасха фестивальны чеклеринде бардырылгъанды. 
Россейни халкъ артисти, дирижёр Валерий Гергиев журналистле бла къысха тюбешиуюнде былай айтханды: «Бу концертни эки дирижёргъа – Юрий эм Пётр Темиркановлагъа - атайбыз. Мен Юрий Темирканов бла кёп жылланы шуёхлукъ жюрютгенме, аны энчи сюйген чыгъармалары бар эдиле, ол дирижёр болуп, аланы кёп къыраллада концертлерине къошханды.  Бюгюн дунияда аты айтылгъан дирижёрну туугъан жеринде  бу чыгъармаланы эшитдирликбиз. Мындан ары да биз Нальчикге концертле бла келирбиз деп ышанабыз».
Пасха фестиваль 2002 жылда Валерий Гергиевни башламчылыгъы бла къуралгъанды. Быйыл ол онунчу майгъа дери барлыкъды, къыркъ шахарда концертле ётерикдиле.
«Россейни белгили театрлары бла байламлыкъла Нальчикде Музыка театрда халкъны эсинде  къаллыкъ постановкала болурларына себеплик этерле деп ийнанабыз», - дегенди Валерий Гергиев. 
Кёллендирген шарт: Мариин театрны аллында майдан энди Юрий Темиркановну атын жюрютюрюкдю. Къабарты-Малкъарда туугъан эм музыкада биринчи атламларын мында этген дирижёр 1976-1988 жыллада Ленинградны опера эм балет къырал театрыны (бусагъатда Мариин  театр) художестволу башчысы эм баш дирижёру болуп тургъанды.  
Музыка адамланы, шахарланы, къыралланы, халкъланы бирлешдирген кючдю. Аны Музыка театрда болгъан сейирлик концерт да кёргюзтгенди. 
Байсыланы Марзият.