Орус география обществону «Альтаир» жаш тёлю биригиую, быйыл биринчи жолоучулугъун обществону 10-жыллыгъына атап, Хеу сууну башына чыкъгъанды. 

Былайны биригиу бошдан сайламагъанды – жууукъ заманда жаш адамла, бери кёпкюнлюк жолоучулукъгъа келип, агъач ичи, суулу юсю бла 25 километрни барлыкъдыла. Хеу аууз Мел хребетни кесегиди, тамаша ариу болгъанындан сора да, мында кёп затха юйренирге, республикабызны битимле эм жаныуарла дуниясын теренирек таныргъа боллукъду.

Эм сейири уа ауузда буруннгулу Тетис тенгизни ызлары табылгъанындады, жолда дайым да бусагъатдагъы кальмарланы бал осьминогланы жаратылгъан таш болгъан аммонитлеге тюбейсе, ала 200 миллион жыл мындан алгъа  динозаврла бла бирге жокъ болгъан эдиле. Жауунла жаугъанларындан сора жер мылы болгъаны, суула да бир кесек кётюрюлгенлери себепли жолоучулагъа резин чурукъла киерге тюшгенди, алай Орус  география обществону регионда Жаш тёлю арасыны башчысы Мокъаланы Тенгиз айтханнга кёре, ала сууланы алай ётюуню жаратхан окъуна этгендиле, аммонитле уа асыры кёпден, аланы эслеринде къаллыкъ саугъаланыча жыйгъандыла. «Активистлерибиз тау республикабызны иги биледиле, алагъа жолоучулукъ бла ёрлеуле, ол санда бийик таулагъа да, дайым къарайбыз. Бюгюннгю жолоучулугъубуз къыйын тюйюл эди, жангызда сууладан ётгенде сабийледен къарыу, чыдамлыкъ, бир бирге болуша билиу да изленнгендиле. Ахырында от тиргизип, ала суу быстырларын къургъакъсытхандыла, ауузланнгандыла, ушакъла этгендиле», - дегенди ол.

Тенгиз билдиргенича, аланы муратлары энди Къашхатаудан бери экикюнлюк жолоучулукъгъа келирге, ауузну башында эски катакомба килисаны кёрюрге, палатка лагерь къураргъа. Сора суу бла Герпегежге тюшергеди. 

Кульчаланы Зульфия.