Кёп болмай Москвада Гематология жаны  бла  илму-тинтиу медицина араны (НМИЦ) специалистлери     Нальчикде болгъандыла. Бу жол къонакълагъа ишни къурау-методика бёлюмню таматасы Елизавета Малолеткина башчылыкъ этгенди. 
Москвачы специалистле  Онкология диспансерде,  Бийик медицина технологияланы республикалы  арасында эмда Сюд-медицина  экспертиза бюрода да болуп, аланы ишлери бла шагъырейленнгендиле, ол санда  къан тамырлары бла байламлы аурууладан къыйналгъанлагъа къалай багъылгъанына  эс бургъандыла.    
Ишчи жолоучулукъларыны кезиуюнде къыралыбызны ара шахарындан келген устала гематолог эмда терапевт врачлагъа, клиникалы  лабораториялада аурууланы тохташдырыу жаны бла ишлеген специалистлеге  семинарла ётдюргендиле. Тинтиуледен сора гематология жаны бла тынгылы медицина болушлукъ бериуню юсюнден эсгертиуле этгендиле.  
Ахырында КъМР-ни саулукъ сакълау министри Рустам Калибатов бла тюбешиулеринде кёргенлерине бюсюрегенлерин айтхандыла. Ол санда гематологиядан саусузлагъа тийишли халда багъылгъаны, билимли, сынамлы кадрла уруннганлары ючюн ыспас этгендиле. Андан сора да, бюгюнлюкде учрежденияла дарманла бла тынгылы жалчытылыннганларын, бийик технологияланы хайырланнганларын эм саусузлагъа иги болум къурай билгенлерин да энчи белгилегендиле. 
Тюбешиуню кезиуюнде  багъыу амалланы игилендириуню, байламлыкъланы кючлей барыуну  онглары да сюзюлгендиле. 

Курданланы Сулейман.