Республиканы курортла эм туризм министерствосунда Орус география биригиуню жаш тёлю бла ишлеу жаны бла бёлюмюню башчысы Дарья Кабанова, регионда жаш тёлю арасыны башчысы Мокъаланы Тенгиз, Россейни къутхарыучуларыны биригиулерини келечиси Назир Наурзоков бла тюбешиу болгъанды. Аны ведомствону башчысыны орунбасары Асланби Шхагапсоев бардыргъанды.
Дарья Кабанова жыйылгъанлагъа Къабарты-Малкъарда былтыр къаллай башламчылыкъла болгъанларыны, ала жашауда къалай бардырылгъанларыны юслеринден айтханды. Ол билдиргеннге кёре, «Табийгъат къоркъуусузлукъ» деген жаш тёлю жарыкъландырыу-туризм проект, къудуретни сакълау, анга жууаплы кёзден къараргъа юйретиу жаны бла аслам иш тамамланылгъанды. Андан тышында, республикадан сабийлеге «Артек», «Орлёнок», «Алые паруса», «Смена» бла «Океан» аралада Орус география биригиуню «Тамаша дунияны таныу» деген сменлерине къатышыргъа онг берилгенди.
Мокъаланы Тенгиз а туризм-краеведение, спорт бла волонтёрлукъ жаны бла ишге энчи эс бёлгенди. Ол белгилегенича, бюгюнлюкде бу жаны бла жетишимле бардыла, биригиуню бёлюмюню бла республиканы жаш тёлюсюню, Курортла эм туризм министерствону араларында кючлю байламлыкъла тохташдырылгъандыла. «Энди муратыбыз - «Къоркъуусузлукъну школун» ачаргъа, тауларыбызда этнография жолоучулукъла къураргъа эмда Ата журтну багъаларгъа юйретген башламчылыкъланы жашауда бардырыргъа. Алагъа жангыз бизни региондан угъай, тыш субъектледен да жаш адамла къатышырыкъдыла. Былайда Орус география биригиуге, министерствогъа да дайым себеплик этип тургъанлары ючюн ыразылыгъымы билдирирге сюеме», - дегенди ол.
Назир Наурзоков а жыйылгъанланы эслерин турист къауумла, жолгъа кеслери алына атланнганла да къоркъуусузлукъну жорукъларына уллу кёллюлюк этмезге тийишли болгъанларына бургъанды. Ол келтирген шартлагъа кёре, жылдан-жылгъа тири солууну сайлагъанланы, республикада солугъанланы саны ёсе барады, алай эсе уа, къоркъуусузлукъну къошакъ мадарларын этмей жарарыкъ тюйюлдю.
Ахырында тюбешиуге къатышханда, мындан арысында да байламлыкъда ишлерге келишгендиле. Асланби Шхагапсоев а Орус геоография биригиуню келечилерине туризмни айнытыугъа салгъан къыйынлары ючюн ыспас этгенди. «Республикабыз солуу онглары бла энчи жерни алады. Анда сизни къыйыныгъыз да уллуду. Сиз илмуну айнытыу, тарых-маданият хазнаны бла табийгъатны сакълау жаны бла кёп иш тамамлайсыз. Анга жаш тёлюню бла сабийлени къошханыгъыз бютюн игиди. Биз да кесибизни жаныбыздан башламчылыкъларыгъызгъа къолубуздан келген болушлукъну этерге хазырбыз», - дегенди ол.
