«Гъуазджэ хъуа IэщIагъэхэр» зи фIэщыгъэ гъэ­лъэгъуэныгъэр иджыблагъэ утыку къыщрахьащ Къэ­рэшей-Шэрджэс Республикэм. Iуэхур къезы­хьэжьар Адыгейм IэщIагъэхэмрэ IэпщIэлъапщIэ­хэмрэ я ассоциацэрщ, бгъэIэпхъуэ хъу гъэлъэ­гъуэныгъэр абы къызэригъэпэщащ Щэнхабзэ жэрдэмхэмкIэ президент фондыр и дэIэпыкъуэгъуу.

Утыку кърахьащ па­сэрей адыгэхэм къагъэ­сэ­бэпу щы­та хьэпшыпхэр, иджы­рей бзылъхугъэхэм зэ­рыза­гъэ­щIэращIэ, цIыхухъу­хэм я фэ­илъхьэгъуэхэм ды­щIагъу хьэпшып цIыкIуфэкIухэр, щы­гъынхэр, нэ­гъуэщI куэ- ди. 
«Мы гъэлъэгъуэныгъэр ­телъыджэ зыщIыр ди республикэм и музей экспонатхэм къытещIыкIахэр, цIыхубэ IэщIагъэм пэрыт IэпщIэлъапщIэхэм я IэдакъэщIэкIхэр зэрыщызэхуэхьэсарщ. Ап­хуэдэ хьэпшып телъыджэхэр ди къуэшхэм едгъэлъагъу-ну, Къэрэшей-Шэрджэсым къэт­шэну Iэмал къыдэзытар Щэнхабзэ жэрдэмхэмкIэ президент фондым и грантыр къызэрытхьарщ, ап­хуэдэуи хуабжьу къыддэIэ­пыкъуащ Адыгэ Республикэм Лэжьыгъэмрэ социаль­нэ зыужьыныгъэмкIэ и ми­нистерствэр. Дыщэидэм, пхъэм, нэгъуэщI лъэны­къуэхэм гурэ псэкIэ етауэ елэжь цIыхуипщIым я IэдакъэщIэкIхэр къэтшащ. Ди мурад нэхъыщхьэр адыгэ тхы­-дэ къулейм цIыхубэр щыгъэ­гъуэзэнырщ, ижь-ижьыж ­лъандэрэ ди лъэпкъым къыдекIуэкI щэнхабзэр, гъуазджэр, IэпщIэлъапщIагъэр нэ­гъуэщI лъэпкъхэм егъэ­лъагъунырщ. Мыбы къекIуа­лIэхэр хьэпшыпхэм еплъ къудей мыхъуу, еIусэ, къызы­хэ­щIыкIар зрагъащIэ, сурэт трах хъунущ. Къищынэ­мы­щIауэ, дэ къыздэтшащ, адыгэ шхыныгъуэхэр, ахэри зыIуагъэхуэнымкIэ зыри пэ­рыуэгъу яхуэхъунукъым», - жиIащ Адыгейм IэщIагъэ­хэмрэ IэпщIэлъапщIэхэмрэ  я ассоциацэм и унафэщI Гумэ Ларисэ.
Гъэлъэгъуэныгъэм хыхьэу жэрдэм зиIэхэр IэпщIэлъапщIэхэм яIущIащ икIи творческэ мастер-классхэр екIуэ­кIащ. КъекIуэлIахэр пасэрей макъамэ Iэмэпсымэм, шы­кIэпшынэм кърагъэкI макъамэхэм щIэдэIуащ, арджэн зэращIым кIэлъыплъащ, ды­щэидэмрэ Iуданэ зэIущэ­нымрэ хуэIэкIуэлъакIуэхэм я чэнджэщхэри яфIэгъэщIэ­гъуэнащ.
- Сэ бзылъхугъэ хъуржынхэр сщIыну сфIэфIщ. Къи­щынэмыщIауэ, иджырей бзылъхугъэхэр модэм тет пэтми, ди лъэпкъ щIэиныр фIыуэ ялъагъури, адыгэ тхы­пхъэщIыпхъэхэр зытет ап­хуэдэ хьэпшыпхэр ящэху. ЦIыхубз хъуржынхэмкIэ къы­щIэздзащ, итIанэ си IэпэмкIэ зэIусща пкъыгъуэхэр утыку сыкъызэрихьэ фащэхэм тездэу щIэздзащ, ауэрэ ды­щэ­идэм сыдихьэхауэ, пыIэхэр, хъуржынхэр, Iэщхьэтхьэмпэхэр согъэщIэращIэ. 
ТхыпхъэщIыпхъэхэм я ­гугъу пщIымэ, ахэр тхылъхэми къыдох е дунейм уи нэгу къыщIегъэхьэ. Фызэрыщыгъуазэщи, адыгэхэр щIыуэп­сым быдэу пыщIауэ къокIуэкI, фащэхэр зэрыгъэ­щIэрэщIа пкъыгъуэхэри аращ къызыхахар. А тхыпхъэхэм мыхьэнэ яIэщ, дэтхэнэми зыгуэр къокI, зыгуэр ущегъэгъуазэ», - жеIэ Iэпэ­Iэсэ, уэрэджыIакIуэ Хъуран Азэ.
Гъэлъэгъуэныгъэр къызэ­зы­гъэпэщахэм къыхагъэщащ Къэрэшей-Шэрджэ­сым нэмыщI, Краснодар крайми зэрыщыIар, иджыри я гъуэгум къыпащэну зэрамурадыр, уеблэмэ къалащхьэм дэсхэм адыгэ щэнха­бзэр ирагъэцIыхун папщIэ Москва яшэну зэрызагъэ­хьэзырыр.

ШэрIужь  Даянэ.