КъБКъУ-м Жылагъуэ жэрдэмхэмкIэ и пэшым иджыблагъэ щекIуэкIащ «Хабзэ хъуа псэкупсэ-щэнгъасэ лъапIэныгъэхэр: сыт дызэкъуэзыгъэувэр?» зэпсэлъэныгъэр. Абы къыщыпсэлъащ Урыс тхыдэмрэ щэнхабзэмкIэ «Вече» зэгухьэныгъэм и унафэщI Литвинов Роман. Ар студентхэм яхутепсэлъыхьащ Урысейм и лъэпкъ политикэм псэкупсэ гъуазэхэм, щэнхабзэм, хабзэхэм мыхьэнэшхуэ зэрыщаIэм.
- Мыхьэнэшхуэ иIэу къызолъытэ хабзэ хъуа псэкупсэ-щэнгъасэ лъапIэныгъэхэм теухуа псалъэмакъыр университетым зэрыщекIуэкIым. Сыт щхьэкIэ жыпIэмэ, мы IуэхущIапIэр щIалэгъуалэм я дуней еплъыкIэр щызэфIэувэ щIыпIэщ. Кавказым лIэщIыгъуэкIэрэ щызэгъунэгъущ лъэпкъ, щэнхабзэ зэмылIэужьыгъуэ щэ бжыгъэхэр, ауэ щыхъукIи, лъэпкъ псоми я лъабжьэ, лъапIэныгъэхэр зыщ. Фэрэ дэрэ ди зэхуэдэ къалэнщ тхыдэм и пэ- жыр, псэкупсэ-щэнгъасэ хъугъуэфIыгъуэхэр тхъумэныр, ахэр къэкIуэну щIэблэм я деж нэтхьэсыныр, - жиIащ Литвиновым.
УФ-м и Президентым къыдигъэкIа «Урысей псэкупсэ-щэнгъасэ лъапIэныгъэхэр хъумэнымрэ гъэбыдэнымкIэ къэрал политикэм и лъабжьэр къэщтэным и IуэхукIэ» унафэм къыщыгъэлъэгъуащ Урысейр и щхьэ хущытыж цивилизацэ щхьэхуэу зэрыщытыр хьэкъ зыщI Iуэху- гъуэ 17. Литвинов Роман зэрыжиIамкIэ, къэралым а лъэныкъуэмкIэ иригъэкIуэкI политикэр зыубзыху дэфтэрым и Iыхьэ нэхъыщхьэхэр зи лъабжьэ правовой акт 47-рэ 2025 гъэм и щэкIуэгъуэ мазэм къищтащ. Аращ иджыпсту екIуэкI лэжьыгъэм лъабжьэ хуэхъур.
Кавказ Ищхъэрэм и щIалэгъуалэм я еплъыкIэр щыубзыхуа доклад утыку кърихьащ Социально-политикэ къэхутэныгъэхэмкIэ центрым и унафэщI, Социальнэ лэжьыгъэм теориемрэ техноло- гиемкIэ и кафедрэм и егъэджакIуэ нэхъыжь, «ЩIэныгъэ» урысейпсо зэгухьэныгъэм и лектор Iэрэмысэ Тимур. Тхыдэ щIэныгъэхэмкIэ кандидат, КъБКъУ-м Социальнэ лэжьыгъэм теориемрэ технологиемкIэ и кафедрэм и доцент Шорэн Залинэ и къэпсэлъэныгъэр триухуащ уна- гъуэ институтыр зи гугъу тщIы лъапIэныгъэхэм я лъабжьэу зэрыщытым. Лекторым щапхъэу къихьащ университетым щра-гъэкIуэкIа щIэупщIэныгъэм къигъэлъэгъуахэр. Псалъэм къыдэкIуэу жыпIэмэ, студентхэм я процент 98-м унагъуэ яухуэну хуейщ, социально-экономикэ гугъуехьхэм емылъытауэ.
- ДыщыщIэупщIэм гу лъыттащ щIалэгъуалэр мы Iуэхум тегушхуауэ зэрыбгъэ-дэтым, унагъуэ къызэрызэрагъэпэщы-ным зэрыхущIэкъум. Унагъуэ щыпщIын хуейр уи ныбжьыр 25-м фIэкIа нэужьу къалъытэ нэхъыбэм. Респондентхэм къыдгурагъаIуэрт зэдэпсэун щIадзэн, сабий зрагъэгъуэтын и пэ щIэныгъэр и кIэм нагъэсын, лэжьапIэ увын зэрыхуейр, - къыхигъэщащ Залинэ.
Студентхэр жыджэру хэтащ мы Iуэхум икIи унагъуэм лъабжьэ хуэхъум, цIыхубзхэмрэ цIыхухъухэмрэ я зэхущытыкIэм, адэ-анэ ныбжьыщIэхэм я Iэмалхэм, анагъэмрэ сабиигъуэмрэ ехьэлIауэ къэра-лым ит дэIэпыкъуныгъэм, нэгъуэщIхэми жыджэру тепсэлъыхьащ.
ЗэIущIэр къызэзыгъэпэщар КъБКъУ-м ЩIалэгъуалэ политикэмрэ социальнэ IуэхухэмкIэ и управленэмрэ Урыс тхыдэмрэ щэнхабзэмкIэ «Вече» зэгухьэныгъэмрэщ.
Дарий Дахэнур.
