КъМР-ни Жарыкъландырыу эмда илму  министерствосуну Профессионал билим берген арасында бу кюнледе жыйылыу болгъанды. Анда  санларында къыяулары болгъанланы араларында сайлагъан усталыкъларына кёре  быйыл республикада онунчу кере бардырыллыкъ  «Абилимпикс»  чемпионатха хазырланыуну юсюнден сёлешиннгенди.

Регионда ол эришиулени къурау бла байламлы жыйылыула ары дери да  бардырылгъандыла, чемпионатха къатышырыкълагъа деп, регион  мардала да тохташдырылгъандыла.

«Абилимпикс» регион къымылдауну арасында, компетенциялагъа тийишлиликде уллу усталыкълары болгъан специалистледен баш экспертлени командасы къуралгъанды. Ала эришиулеге къатышырыкълагъа хар не бла да тынгылы жалчытылгъан участкаланы кёргюзтюрге, керек болса, соруулагъа жууапла берирге да хазырдыла. Регион арада ишлегенле чемпионат тынгылы бардырылыр ючюн деп, хар не гитче затха да  уллу эс бурадыла.

Дагъыда  эришиулеге къатышханла бош заманларында  сейирлерине кёре тюрлю-тюрлю  конкурслагъа, маданият ишлеге, спорт эришиулеге да къатышырча онгла  къураллыкъдыла. Андан сора да,  конкурс майданланы хазырлыкълары не халда болгъанларын билир муратда онлайн халда дайым  кенгешле, ушакъла бардырылгъанлай турлукъдула.

- Бизни республикада «Абилимпикс» чемпионатла  эсде къаллыкъ байрамлача ётедиле. Нек дегенде хар нени да биз кеси къолларыбыз бла хазырлайбыз, жюрегибизни жылыуун  аямайбыз. Чемпионатха  къатышханла анга бек  уллу ыразылыкъ бла къатышханларын айтадыла. Быйыл да ала сокъуранмазча мадарла этиледиле, - дегенди «Абилимпикс» чемпионатны регионда  башчысы  Сатаней Къурашева.

Холаланы Марзият.