Бу кюнледе «Радуга» республикалы социал-реабилитация  арада Аутизмден ауругъанланы битеудуния кюнюне жораланнган кенгеш болгъанды. Аны ишине КъМР-ни Урунуу эмда социал къоруулау  министерствосуну келечилери, аны бойсунууунда болгъан учрежденияланы психологлары эмда социал иш бла кюрешгенле, республиканы Саулукъ сакълау, Маданият, Жарыкъландырыу эмда илму  министерстволарыны эмда башха ведомстволаны келечилери, волонтёрла-медикле да къатышхандыла.

Ишни башлай, КъМР-ни урунуу эмда социал къоруулау министрини орунбасары Ратмир Ацканов бу жыйылыу не хыйсапдан къуралгъанын ангылатханды.

Баш доклад бла уа  КъМР-де Сабийни эркинликлери жаны бла уполномоченный  Амина Бадракова сёлешгенди. Ол аутизмден ауругъан сабийлени социал жаны бла къоруулау бла байламлы къаллай ишле тамамлагъанларын айтханды. «Биз къурагъан  мастер-классла, тюрлю-тюрлю тренингле, аллай энчи сабийле, аланы ата-аналары бла тюбешиулерибиз, башха жумушларыбыз да хайырлылыкъларын кёргюзтгендиле. Биз этген бир-бир мадарладан сора сабийле атларгъа, сёлеширге, жамауатха къошулургъа да итинип башлагъандыла. Бирлери уа тепсеген окъуна этедиле»,- дегенди.

Андан сора докладчы къаллай  проектле бла ишлегенлерин, кимле бла байламлыкъ этгенлерин да билдиргенди. Сёз ючюн, Нальчикде Урунууну эмда социал къоруулауну арасы министерстволаны бла ведомстволаны бир къаууму бла бирге ишлеуню юсюнден келишимле  этгенди. Ала аутист сабийлеге тёгереклеринде жашаугъа юйренирге болушадыла. Аллай келишимле Т.Мальбахов атлы миллет библиотека, «Спартак» стадион, Музыка театр, Суратлау искусстволаны музейи, «Орешка» сабий оюн ара эм башхала бла этилгендиле.

- Быйыл «Инклюзияны тийреси – огъурлулукъну тийреси» деген проектни да хазырлагъанбыз. Анга кёре, биз аутизм ауруулары болгъанланы башха сабийле бла бирге ойнаргъа, абериле ишлерге, шуёхлукъ жюрютюрге да юйретебиз. Жылны башындан бери аны чеклеринде эки тюбешиу бардыргъанбыз: пицца хазырлау жаны бла мастер-класс эмда арт-терапия. Бу иш андан ары  бардырыллыкъды»,- деп ышандыргъанды Амина Бадракова.

Жыйылыугъа келген ата-анала Республикалы психология-медицина-социал арадан устаз-логопед Ирина Дзахмышевагъа  тынгылагъандыла. Ол энчи сабийлени сёлешалмагъанларыны сылтауларын ангылатыргъа кюрешгенди эмда аланы багъыуну амаллары бла да шагъырейлендиргенди.

Аутизмни алгъадан къалай ачыкъларгъа боллугъуну юсюнден а КъМР-ни Саулукъ сакълау министерствосуну психо-неврология диспансеринден специалист Мадина Дохова билдириу этгенди. Прохладныйде интернатны устаз-психологу Нина Кодякинаны оюмуна кёре  уа, аутизмден ауругъан сабийлени психологияларына да къайгъырыргъа керекди.

Ахырында ата-анала специалистлеге кёп соруула бергендиле, тынгылы жууапла да алгъандыла.

Ол кюн дагъыда сурат ишлеуден, пластилин бла абериле этиуден мастер-классла ётгендиле. Энчи сабийле этген абериледен эмда «Жауунну сабийлери» деген кёрмючле да къуралгъандыла. 

Залда олтургъанла концерт программагъа да сюйюп къарагъандыла.
«Ышаныуну юйю» деген биригиуню башчысы Артур Шегай Нальчик Урунуу эмда социал къоруулау ара бардыргъан ишлеге не заманда да тири къатышады. Бу жол да ол сабийлени барысына да хуржунла бла татлы ашарыкъла эмда жумушакъ илляула юлешгенди. 

Холаланы Марзият.