Къабарты-Малкъарда энчи аскер операциягъа къатышханланы окъутуугъа, аланы мамыр жашауда кеслерине жер табаргъа болушурукъ проект жашауда бардырылып башлагъанды. Ол «Къабарты-Малкъарны жигитлери» программаны чеклеринде толтурулады.
Артём Шаповалов ол программагъа къатышханладан бириди. Аны юсюнден оюмун айта, ол былай белгилегенди: «Мени кёллендирген неди десегиз, бийик къуллукълада ишлегенледен кёплерини кеслерини жашау, иш сынауларындан юлюш этгенлери, адамла бла бир тилли болургъа юйретгенлери».
Программаны чеклеринде кёп тюрлю жумушла бардырыладыла – отчёт коллегияладан башлап патриотлукъ акциялагъа дери да. Аллай ишле программагъа къатышханлагъа оноу этиу бла байламлы къуллукълада сынауларын ёсдюрюрге, регионну жамауат жашаууна тири къатышыргъа онг бередиле.
Артём Шаповалов къыралны эм республиканы оноучуларына бу башламчылыкъны къурагъанлары ючюн жюрек ыразылыгъын билдиргенди.
Кючмезланы Айза.
