ДзюдомкIэ Европэм и чемпионату мы гъэм мэлы­жьыхьым и 16 - 19-хэм Гру­зием и къалащхьэ Тбилиси щекIуэкIынум зыхуагъэ­хьэ­зыру Урысей Федерацэм и командэ нэхъыщхьэр мы махуэхэм щыIэщ Къэбэрдей-Балъкъэрым и Кэнжэ къуа­жэм дэт «Пять колец» спорт академием. Мыбы кърихьэлIащ ди къэралым и бэнакIуэ нэхъ лъэщ дыдэ цIыхухъухэри цIыхубзхэри.

Командэм и тренер нэхъыжь, Олимп джэгухэм я чемпион Галстян Арсен жиIащ европей чемпионатым зыхуа­гъэхьэзыру ирагъэкIуэкI зэ­хуэс­хэм я иужьрей дыдэ Iы­хьэр Налшык щрагъэкIуэкIыну къыщIыхахар:
«Дэ къэтлъытащ базэ ­хъарзынэ мыбы зэриIэр, ды­зыхуей-дызыхуэфIхэмкIэ ды­зэ­пэщу, ди унэжь дыщыIэж хуэдэу, Европэм и чемпинатым мыбдеж зэрызыщыхуэдгъэхьэзырыфынур. Налшык къалэр псоми фIыуэ ялъагъу, ди спортсменхэми тренерхэми я нэхъыбэр Къэбэрдей-­Балъкъэрым щыщщ». 
Апхуэдуи абы къыхигъэщащ, зыхуагъэувыжа планым тету, мазэ къэс зэрылажьэхэр. Иджыпсту тренировкэхэм ­хагъэкIащ къарум хэгъэхъуэ­ным хуэгъэпса Iэмалхэр, нэ­хъыбэу зэгугъухэр я псынщIагъэмрэ бэшэчагъымрэ зе­гъэу­жьынырщ. Чемпионатым нэхъ гъунэгъу хуэхъуху гугъуехьым пыщIа зыгъэсэныгъэхэр нэхъ мащIэ ящI. Но­бэкIэ, спортсмен 90 Налшык щызэхуэсащ.
«Ди мурадхэр къыдэхъу­лIэмэ, мы гъэм и фокIадэм иджыри зэ къытедгъэзэжынкIэ хъунущ, дунейпсо чемпионатым зыхуэдгъэхьэзырыну», - къыдыщIигъужащ трене­рым.
ХьэщIэхэм я гъусэу Налшык щыIащ УФ-м и командэ къыхэхам и тренер нэхъыжь, Олимп джэгухэм я призер Тау Хьэсэнбий. 
«Сэ срогушхуэ икIи сропагэ къэралым и командэ нэхъы­щхьэм ди республикэм зэры­зыщигъасэм. БэнакIуэ нэхъ лъэщ дыдэхэр къэкIуащ мыбы. Нэгъабэ екIуэкIа европей чемпионатым гупхэм я зэпеуэм япэ увыпIэр къыщытхьауэ щытащ. Шэч къытес­хьэркъым мы гъэми ар абы­хэм зэрызыIэрагъэхьэнум», - жиIащ абы. 
Дуней псоми Европэми я чемпион Арбузов Тимур ди республикэр и хамэкъым: ар щеджащ КъБКъУ-м и педагогикэ къудамэм, езыр Ставрополь щIыналъэм щыщщ. 
«Сэ иджыпсту си къалэн, плъапIэ нэхъыщхьэу щытыр европей чемпионатым сыхуэ­хьэзыру сыпежьэнырщ. Лэ­жьы­гъэ нэхъыщхьэхэр зэфIэ­кIащ, къэнэжар - зыгуэр тIэкIухэр гъэзэкIуэжынырщ. ЗэIущIэхэр хьэлъэу щытынущ, ахэр тыншынкIэ сыгугъэркъым. Дыщэ медаль къы­зэ­рысхьыным сыхущIэкъунущ.
Тренерхэм я планым дытету псори долажьэ икIи абы дебакъуэркъым. Сыт хуэдэ зэфIэ­кIыфIхэр, ехъулIэныгъэхэр спорт­сменым имыIами, псом япэ идгъэщыр жыIэдаIуэу щы­тынымрэ Iэдэбагъым­рэщ», - жиIащ Арбузов Тимур. 
Къэбэрдей-Балъкъэрыр иужьрей илъэсхэм зэрыгуш­хуэ бэнакIуэ, УФ-м спортымкIэ щIыхь зиIэ и мастер цIэ ­лъапIэр иджыблагъэ къызы­хуагъэфэща Блий Iэюб жиIащ «Пять колец» спорт академием щилъэгъуахэм хьэщыкъ зэращIар.
«Пэжыр жыпIэмэ, си гугъакъым апхуэдэ зэфIэкIхэр иIэу, сыт и лъэныкъуэкIи зэпэщщ. Зэхьэзэхуэ инхэм уи унэ ущыIэу захуэбгъэхьэзырыныр куэдкIэ нэхъ тыншщ икIи гупсэхущ. Иджыпсту псом нэхърэ нэхъыщхьэр, зыгъэсэныгъэхэм фэбжь хэдмыхынырщ, ди хьэлъагъым хэдгъэщIы­нырщ», - къыддогуашэ Блийр.
 Iэюб езыр иджы екIуэкIыну чемпионатым кIуэнукъым - дегъэху, и къалэныр - адрей щIалэхэм ядэIэпыкъунырщ, зэхьэзэхуэм ахэр хуэхьэгъэзырынырщ. 
Осетие Ищхъэрэ - Аланием и бэнакIуэ цIэрыIуэ, Олимп джэгухэм домбеякъ медаль къыщызыхьа Таймазовэ Мадинэ жиIащ и унэ хуэдэу Налшык къалэм зэрыщыIэр.
«ИкъукIэ гуапэу къыщытIущIащ. МахуитI хъуауэ аращ дызэрыщыIэри, гухэхъуэрэ дэрэжэгъуэу дгъуэтар зыхуэдизыр, пхужымыIэнщ. 
Дэтхэнэ зы спортсменми и плъапIэр дыщэ медалщ. Укъы­зэмыплъэкIыу икIи узы­щымысхьыжу улэжьынырщ абы и шэсыпIэр», - жиIащ осетин бзылъхугъэм. 
«Пять колец» спорт академием щрагъэкIуэкI зэхуэсыр зэрызэфIэкIыу, УФ-м и командэ нэхъыщхьэр Тбилиси лъэ­тэнущ. Я мурадхэр къе­хъу­лIэну ди гуапэщ. 
Европэм и чемпионатым хэтынущ къэрал 46-м я спортсмену 419-рэ, абы щыщу 236-р щIалэу, 183-р бзылъхугъэу икIи медаль комплекту 14-м ахэр щIэбэнынущ. 
ХЬЭЩЫКЪУЕЙ  Олег.