Бахъсэн къалэм дэт курыт еджапIэ №5-м мэлыжьыхьым и 3-м щекIуэкIащ КъБР-м и япэ президенту щыта КIуэкIуэ Валерэ къызэралъхурэ илъэс 85-рэ зэрырикъум теухуа фэеплъ пшыхь. Ар къызэрагъэпэщат Болэт Ланэ зи унафэщI, зи гугъу тщIы курыт еджапIэмрэ «Росдетцентр»-м Бахъсэн къалэ округым щиIэ къудамэмрэ.
пшыхьым кърихьэлIат Бахъсэн къалэ округым и Iэтащхьэм и япэ къуэдзэ Архъагъэ Зухра, Бахъсэн къалэ округым егъэджэныгъэмкIэ и департаментым и унафэщI Борэн Маринэ, тхыдэ щIэныгъэхэмкIэ кандидат, Бахъсэн къалэ округым и Iэтащхьэм и чэнджэщэгъу Зеущэ Хьэмид, КъБР-м щIыхь зиIэ и журналист, КIуэкIуэ Валерэ и пресс-секретару щыта Къудей Владимир, курыт еджапIэм къыщыдеджа, и ныбжьэгъу пэжу щыта ЛIыгуащIэ Хъалиф, ЩIэныгъэхэмкIэ Дунейпсо Адыгэ академием хэт корреспондент, тхакIуэ, журналист, «Адыгэ псалъэ» газетым и лэжьакIуэ Фырэ-Къаныкъуэ Анфисэ, Бахъсэн къалэ округым и Ветеранхэм я зэгухьэныгъэм и унафэщI Абазэ Хъусен, ку-рыт еджапIэхэм я унафэщIхэр, нэгъуэщIхэри.
- КIуэкIуэ Валерэ утепсэлъыхьыну гугъущ. Ар цIыхушхуэу, акъылыфIэу, хахуэу щытащ. Дэ абы дыдэлэжьащ, дыкъызэдэгъуэгурыкIуащ. ЦIыхухэр фIыуэ илъагъурт, щIалэгъуалэм гулъытэшхуэ яхуищIырт. Ар дунейм щехыжам щыгъуэ, Валерэ зыцIыхуа псоми хуабжьу къыдэхьэлъэкIащ. А гуауэр нобэр къыздэсым зыхыдощIэ. Валерэ Урысейм и политик нэхъ лъэрызехьэ дыдэхэм ящыщу щытащ жыпIэмэ, ущыуэнукъым. Ар ди тхыдэм къыхэнащ къэралым и зэхэзэрыхьыгъуэ дыдэм къызыхэкIа лъэпкъым гъуазэ хуэхъуу, мамырыгъэр зыхъумэфа, щIыналъэм зезыгъэIэта, зезыгъэужьа унафэщIышхуэу. Нобэ мыбдеж дыщIызэхуэсар ар дигу къэдгъэкIыжын, и гъащIэмрэ лэжьыгъэмрэ иджыри зэ дриплъэжу, дерс гуэр хэтхын папщIэщи, кърихьэлIа псоми фIыщIэ фхузощI, - жиIащ Зеущэ Хьэмид.
ЗэIущIэм щытепсэлъыхьащ КIуэкIуэ Валерэ и политикэ лэжьыгъэмрэ 1990 гъэхэм къэралыр зыхэта зэрыхьзэрийм щIыналъэр бэIутIэIуншэу хэшынымкIэ хузэфIэкIамрэ.
Апхуэдэу, КIуэкIуэ Валерэ РСФСР-м и цIыхубэ депутатхэм я советым, КонституцэмкIэ комиссэм хэтащ, Куржы-Абхъаз зауэм и гуащIэгъуэмрэ ди щIыналъэ оппозицэм я зыкъэIэтыгъуэмрэ президенту хахри, бжьыпэр иубыдащ 1992 гъэм. УнафэщI къалэныр екIуу къызэрехъулIэм и щыхьэтт ар 1997 гъэм етIуанэ пIалъэкIи зэрыхахыжар.
- Къэралым и щэщэжыгъуэм щIыналъэм и президенту утеувэу цIыхухэр мамырыгъэм, шыIэныгъэм, зэгурыIуэныгъэм къыхуебджэну, экономикэмрэ политикэмрэ зэтебублэжыну гугъущ. ИкIи абы утегушхуэу уеувэлIэныр лIыгъэмрэ хахуагъэмрэ я щхьэж къакIуэ гуэрщ. Зэман хьэлъэм уи лъэпкъым гъуазэ ухуэхъуу, лъагъуэ пэжым тумыгъэкIыныр жэуаплыныгъэшхуэщ икIи КIуэкIуэ Валерэ щIыхь пылъу игъэзэщIащ и пщэ къыдэхуа къалэн мытыншхэр. Ар цIыху щэджащэу, политик зэчиифIэу щытащ. Нобэ мамырыгъэр ди гъуазэу дыпсэуми, абыкIэ псыпэхэш хъуа ди япэ Президентырщ фIыщIэр зейр. Сэ сропагэ икIи срогушхуэ абы сэрэ зы къуажэ дыкъызэрыдэкIам. ФIыщIэ хуэсщIыну сыхуейт мы зэIущIэр къызэзыгъэпэщахэм, щIэблэр хэкупсэу гъэсэным, ди блэкIам щыгъэгъуэзэным папщIэ лэжьыгъэшхуэ зэфIэзых егъэджакIуэхэмрэ унафэщIхэмрэ. Нобэрей зэIущIэр ягъэдахэ мы курыт еджапIэм щIэс ныбжьыщIэхэм я IэдакъэщIэкI сурэтхэм. Гъуазджэр лъабжьэ пщIыуэ щIэблэр тхыдэм щыбгъэгъуэзэныр Iуэхушхуэщ, IэмалыфIщ. Фи IэщIагъэм и хъер флъагъуу тхьэм куэдрэ узыншэу фигъэлажьэ, - захуигъэзащ Фырэ-Къаныкъуэ Анфисэ зэIущIэм кърихьэлIахэмрэ ар къызэзыгъэпэщахэмрэ.
«Лъэпкъым ухуэлэжьэным нэхъ насып щыIэкъым» жызыIа КIуэкIуэ Валерэ хуэуса, Бахъсэн къалэ округым и курыт еджапIэ №2-м и унафэщI Нэгъуей Ахьмэд, УФ-м егъэджэныгъэмкIэ щIыхь зиIэ и лэжьакIуэ, усакIуэ Мэржэхъу ФатIимэ, адыгэбзэмрэ литературэмкIэ егъэджакIуэхэу Быф Еленэ, Балъкъыз-Бещто Фаридэ, Лосэн Хьэужан сымэ къеджащ я IэдакъэщIэкIхэм.
ЗэIущIэр уэрэдрэ къафэкIэ ягъэдэхащ курыт еджапIэм щIэс ныбжьыщIэхэм.
Тамбий Гуащэмахуэ.
