Сухумда Къабарты-Малкъар Республиканы Правительствосуну бла Абхазия Республиканы Правительствосуну араларында сатыу-алыу-экономика, илму-техника эмда маданият байламлыкъланы юсюнден келишимге къол салыннганды. Аны юсюнден КъМР-ни Башчысы Казбек Коковну МАХ платформада энчи каналында айтылынады.
Документге къолну Абхазия Республиканы премьер-министри Владимир Делба бла бирге салгъандыла.
Анга кёре экономикагъа хайырлы болумланы къурау, иелик субъектлени араларында тюзюнлей байламлыкъланы тохташдырыу, товарланы келтириу бла жумушланы тапдырыу, бирлешген ярмаркаланы бла кёрмючлени бардырыу жаны бла иш этилликди, дагъыда маданиятда, адабиятда, санатда, спортда, жаш тёлю проектлени бардырыуда байламлыкъла кючленирикдиле.
Жууукъ заманда Нальчикни бла Сухумну администрацияларыны, республикалы уллу саулукъ сакълау махкемелени, Къабарты-Малкъар Республиканы Айныу корпорациясыны бла Абхазия Республиканы Къырал инвестиция агентствосуну араларында келишимлеге къол салыугъа да эс буруллукъду.
Байламлыкъланы алгъын ахшы сынамы бла бирге бюгюннгю сёз тохташдырыула къарындаш регионланы араларында ишчи байламлыкъланы тирирек болууларына атламдыла. «Бизни республиканы ол жанына сейири барды – хайырлы башламчылыкъланы бардырыу эм ёсдюрюу жаны бла ишлегенлей турлукъбуз», – деп белгилейди Казбек Коков.
