Дыгулыбгъуей къуажэм щекIуэкIащ фэеплъ пхъэбгъу къызэIухыным теухуа зэхыхьэ. Ар хуагъэуващ зи къа-лэн зыгъэзащIэу хэкIуэда Нэгъуейхэ Муратрэ Азэмэтрэ зэкъуэшхэм я щIыхькIэ. 

ЗэIущIэм кърихьэлIащ къэрал кIуэцI IуэхухэмкIэ министру КъБР-м щыIэм и къуэдзэ Бахъуэ Аслъэн, щIыпIэ ад­министрацэм и лIыкIуэхэу Мамхэгъ Хьэчим зи пашэр, Нэ­гъуей зэкъуэшхуэм я унафэщIу щыта Тохъутэмыщ Му­хьэ­мэд, хэкIуэда лIыхъужьхэм я Iыхьлыхэр, хабзэхъумэхэр, жы­лагъуэ лэжьакIуэхэмрэ щIыпIэм щыпсэухэмрэ. 
Iуэхум щIадзащ Урысей Федерацэм и къэрал гимныр ­кърагъауэу. АдэкIэ хьэщIэхэр къэпсэлъащ Нэгъуей зэ­къуэшхэм я лIыгъэмрэ къэмылэнджагъэмрэ, я къалэныр гъэзэщIэным етауэ зэрыщытам трагъащIэу. 
- Ди лIыхъужьхэм я фэеплъыр сыт щыгъуи тщIыгъущ, абыхэм дропагэ икIи пщIэ яхудощI, - къыхигъэщащ Бахъуэ Аслъэн. 
Милицэм и майор Нэгъуей Мурат оперуполномоченнэ ­нэхъыжьу къалэныр щрихьэкIащ КъБР-м щыIэ МВД-м ­Экстремизмэм пэщIэтынымкIэ и центрым. Ар IэщIагъэлI нэст, къулыкъуми спортми ехъулIэныгъэхэр щызыIэригъэ­хьащ, ведомствэ дамыгъэхэр къыхуагъэфэщащ. Милицэм и капитан Нэгъуей Азэмэт ЗэгъэуIуауэ ялэжь щIэпхъа-  джагъэхэм япэщIэтынымкIэ управленэм и оперуполномоченнэу щытащ, къигъэлъэгъуа хахуагъэм пэкIуэу ЛIыгъэм  и орден къыхуагъэфэщащ мыпсэужу. Нэгъуей зэкъуэшхэм я гъащIэр щапхъэ нэст тхьэрыIуэм хуэпэжынымрэ Хэкум хуэлэжьэнымкIэ. 
ИужькIэ фэеплъ пхъэбгъур къызэIухащ. Къызэхуэсахэр дакъикъэкIэ щымри, абдежым удз гъэгъахэр щагъэтIы­лъащ. 
Хабзэхъумэ IэнатIэхэм я лэжьакIуэхэм фIыщIэрэ пщIэрэ яхуэщIыныр, тхыдэ фэеплъыр хъумэныр къэзыгъэлъагъуэ, щIэблэщIэр хэкупсэу гъэсэнымкIэ мыхьэнэшхуэ зиIэ хъуащ Iуэхур. 
БАХЪСЭН  Ланэ.