Кавказны жазыучуларыны клубуну Къабарты-Малкъарда бёлюмюню кезиулю жыйылыуу Тиширыуланы халкъла аралы кюнюне аталгъанды. Тёреде бола келгенича, жыйылыу Нальчикде Къулийланы Къайсынны атын жюрютген орамда модуль китапханада ётгенди.
Тиширыуланы алгъышлай, бёлюмню башчысы Османланы Хыйса жаз башында хар инсанны да жюрегинде жангы умутла, муратла жаратылгъанларын, къыш сууукъланы къарын эрите, кюнню таякълары дуниягъа, адамлагъа да жылыу келтиргенлерин белгилегенди. Аны «Тиширыулагъа – гюлле», «Ышаргъанынгы саугъа эт манга» деген назмулары, Уяналаны Алийни Хыйсаны «Келмейсе» деген назмусуна жазылгъан жыры уа жыйылгъан тиширыулагъа, керти да, саугъа болгъандыла.
Ызы бла «Альтернатива» клубну келечилери – Хучиналаны Алина, Султан Егожев, София Юшта, Лиана Тхашугоева, Каплан Шинахов – аналагъа аталгъан назмуланы окъуп, жыйылыугъа бютюн къууат бергендиле.
Шайыр Болатланы Юруслан а кёп болмай «Бир дуния, бир юйюр» деген битеудуния маданият фестивальдан къайтханын билдиргенди. «Ол Юг Индияда 100 кюнню бардырылгъанды. Аллай узун болжаллы фестиваль биринчи кере болгъанды, анга къыралла кёп къалмай барысы да къатышхандыла. Аны ахырында болгъан гала-концерт фестиваль да Гиннессни рекордла китабына киргендиле. Мен анга «адамлыкъны жаз башы» дерик эдим, алай жарыкъ, сейир да болгъанды ол. Адамланы араларында къаршылыкъ, бирлик анда терен сезиле эди, мен аны ахыр кюнюне дери тургъанма», – дегенди ол.
Юруслан Индияда тургъан кезиуюнде жазып башлагъан китабындан назмуларын эшитдиргенди.
– Биз саулайда дунияны сабийлерибиз, алай бир-бирде аны унутуп, жангылабыз. Бусагъатда бола тургъан ишле анга шагъатлыкъ этедиле. Болсада не тюрлю болумлада да ананы жарыкъ, сюйдюмлю сыфаты, инсанны эм иги, эм огъурлу ышанларын кючлей, жангыдан жашаугъа къайтарады. Ананы сюймеген адам хазна табылыр, аман, иги болса да. Аналарыбыз саулукъда, терен къартлыкъгъа жетсек да, сабийлебиз, – деп, Россейни Жазыучуларыны союзуну келечиси, Къарачай-Черкесден къонакъ Лариса Шебзухова анасы ёлген заманда жазгъан «Анадан узакъда» деген назмусун окъугъанды.
Назмула окъуп дагъыда «Альтернатива» клубну башчысы Марита Жамбеева, жыры бла уа Улбашланы Азнор къууандыргъандыла.
Жыйылыу ариу алгъышла, бирге суратха тюшюу бла бошалгъанды.
Кульчаланы Зульфия.
Суратны автор алгъанды
