Келир заманлада энергетик болуп урунурукъ жашла бла къызла Россейни энергетикада эм эрттегили объектини иши бла шагъырейленнгендиле. «РусГидро» компанияны бизни республикада бёлюмю Басхан ГЭС-ге экскурсия къурап, ары Къабарты-Малкъар къырал аграр университетни «Электроэнергетика эм электротехника» бёлюмюню биринчи курсунда окъугъанланы чакъыргъанды. Компания бу жумушну Ата журтну къоруулаучуну кюнюне жоралап бардыргъанды. Инженер боллукъ жаш тёлюге аны магъанасы уллу болгъанына сёз да жокъду.

Басхан ГЭС ГОЭЛРО планны чеклеринде ишленнген станцияды. Ол бюгюн-бюгече да электрокюч чыгъара, инженер усталыкъгъа эсгертме болгъанлай турады.

Къонакълагъа экскурсияны электрокючню чыгъарыуда хар атлам да кёрюнюрча алай бардыргъандыла. Ала бла бирге «Предприятияланы энергия бла жалчытыу» кафедраны устазлары эмда станцияны тамата устасы да болгъандыла анда.

Жаш тёлю ГЭС-ге къарауну машинала орналгъан залдан башлагъанды. Анда ишлеген юч гидроагрегатны чархларын уллу басым бла келген суу буруп электрокюч алай чыгъады. Студентле алагъа, башха оборудованиягъа эмда мюлкге кёз жетдиргендиле, сейирлерин къозгъагъан затланы юсюнден сорууларын да кем этмегендиле. Дагъыда станцияны огъары жанында сууну жыйгъан тийреге, аны басым бла жиберген объектге, турбинала къалай ишлегенлерине да къарагъандыла. Ахырында уа токну тышына жиберген мекямгъа киргендиле эмда станцияны хар несине да контроль этген ара пультну иши бла шагъырейленнгендиле.

«Бу станциягъа келип къараргъа, студентлени усталыкъ сайлау жаны бла сагъышларына да себеплик этгенлери ючюн «РусГидро-ну» Къабарты-Малкъарда бёлюмюне ыразылыгъыбызны билдирирге сюебиз. Жаш адамлагъа энергетика объектледе болуп, инженер-энергетик усталыкъны магъанасына тюшюнюрча ол аламат амалды», - дегенди сагъынылгъан кафедраны башчысы Амур Фиапшев.

Компания быллай экскурсияланы терк-терк бардыра туруучуду. Ала жаш тёлюню сейирин энергетикагъа бла инженер усталыкъгъа бурур хыйсап бла къураладыла. Республикада билим бериу организацияла бла байламлыкъланы кючлеуде да быллай жумушланы магъанасы уллуду. Студентлеге да ол сынам береди, алгъан билимлерин ишде къалай хайырланыргъа боллукъларын кёргюзтеди.

Улбашланы Мурат.