Анэдэлъхубзэхэм я дунейпсо махуэм хуэгъэпса «Лъэпкъыр зымыгъэкIуэдыр и бзэрщ» Iуэхугъуэр щрагъэжьащ КъБКъУ-м. Ар къызэрагъэпэщащ ЦIыпIынэ Аслъэн и цIэр зезыхьэ адыгэ щэнхабзэмкIэ центрымрэ Отаров Керим и цIэкIэ щыIэ балъкъэр щэнхабзэмкIэ центрымрэ.
Республикэм ис лъэпкъхэм я бзэр, я щIэинхэр хъумэным, ар лIакъуэкIэрэ зэIэпыхыным хуэунэтIа Iуэхухэр мазаем и 10-м къыщыщIэдзауэ гъатхэпэм и 14 пщIондэ екIуэкIынущ.
КъызэгъэпэщакIуэхэм гулъытэ хэха хуащIащ зи юбилейхэр мы гъэм ягъэлъапIэ литературэм, щэнхабзэм я лэжьакIуэ цIэрыIуэхэу Шортэн Аскэрбий, ЩоджэнцIыкIу Iэдэм, Шахмурзаев Саид, Геттуев Мыхьэмэт сымэ я творчествэм.
Программэм хохьэ школакIуэхэмрэ студентхэмрэ папщIэ къэхутэныгъэ, творческэ лэжьыгъэхэмкIэ зэпеуэхэр, курыт еджапIэхэм анэдэлъхубзэхэмкIэ щезыгъаджэхэм я лекцэхэр, зэпсэлъэныгъэхэр, мастер-классхэр. Апхуэдэуи дяпэкIэ бзэщIэныгъэлI, егъэджакIуэ хъунухэм ирагъэлъагъунущ куэд щIауэ лажьэ егъэджакIуэхэм я методикэр. 
Япэ махуэм школакIуэхэм университетым зыщрагъэплъыхьащ, «Псалъэ гуапэр лъэпкъым и Iущыгъэщ» дерс драгъэкIуэкIащ.
Зэпеуэр IыхьитIу екIуэкIынущ, заочнэ (онлайн), очнэ жыпхъэхэм иту. Лэжьыгъэ нэхъыфI зыгъэхьэзырахэр ягъэпэжэнущ Къэбэрдей-Балъкъэр къэрал университетым и унафэщIхэм къабгъэдэкI щIыхь тхылъхэмрэ фэеплъ тыгъэхэмкIэ. ТекIуахэр щагъэлъэпIэнущ гъатхэпэм и 14-м къызэрагъэпэщыну гуфIэгъуэ зэхыхьэм.
Мы Iуэхур хуэунэтIащ щIалэгъуалэм анэдэлъхубзэр джыным хуащI гулъытэр къэIэтыным, Урысейм ис лъэпкъ зэмылIэужьыгъуэхэм я щэнхабзэ бейхэр зэгъэцIыхуным, пщIэ хуэщIыным.

ШэрIужь Даянэ.