«ЩIэныгъэ» урысей зэгу­хьэныгъэм мазаем и 5-м Лъэпкъ центрым щригъэ­кIуэ­кIа «Урысейр унагъуэхэм я унэщ» марафоным УФ-м и Президент Путин Влади­мир къыщызэIуихащ Урысейм ис лъэпкъхэм я зэкъуэ­тыныгъэм и илъэсыр. Зэ­хыхьэм цIыху миниплIым ­щIигъу, ди къэралым щыпсэу лъэпкъи 190-м щIигъум я лIыкIуэхэр, къе­кIуэлIащ. Абы­хэм яхэтт школакIуэхэр, студентхэр, хамэ къэралхэм къикIа хьэщIэхэр.

«ЩIэныгъэ» зэгухьэныгъэм и гъусэу марафоныр ­къы­зэрагъэпэщащ Урысейм и ­Правительствэм, Урысейм Лъэпкъ IуэхухэмкIэ и феде­ральнэ агентствэм, Росмолодежым, ЩIэныгъэмрэ щIэныгъэ нэхъыщхьэмкIэ и министерствэм, Президентым деж Лъэпкъ зэхущы­тыкIэхэмкIэ  щы­Iэ советым, ­УФ-м Егъэ­джэныгъэмкIэ и министерст­вэм, «Урысей» лъэпкъ центрым, Урысей Федерацэм ис лъэпкъхэм я унэм, Урысейм ис лъэпкъхэм я ассамблеем, «Экс­мо-АСТ» тхылъ тедзапIэм. 
«Урысейм ис лъэпкъхэм я ­зэкъуэтыныгъэм и илъэсыр» Урысей Федерацэм щегъэ­кIуэ­кIыным и IуэхукIэ» Унафэ №962-м къэралым и Iэтащ­-хьэм Iэ щIидзащ 2025 гъэм ­дыгъэгъазэм и 25-м. 
- Лей хъунукъым псори дыкъызыхэкIар, Урысейр къы­зэ­рыунэхуар, ди лъэпкъхэр къы­зэрежьар дигу къэдгъэ­кIы­жы­ныр. КъежьапIэ хъуар, дауи, зэпэщхьэхуэу псэуа славян лъэпкъ зэмылIэужьыгъуэ-хэрщ, ахэр щызэкъуэувар зы щIыналъэ ягъуэта нэужьщ, иджы­псту зэрыжаIэм хуэдэу, я экономикэ сэбэп зыхэлъхэр, зы псэкупсэ лъапIэныгъэхэр къа­щылъыкъуэкIарщ, - жиIащ Путин Владимир къыщыпсалъэм. - Урыс лъэпкъым иджыри апхуэдэу ныбжьышхуэ иIэкъым, къэкIуэнум хуэпабгъэу гъуэгу теува къудейщ. Нэ­гъуэщI лъэпкъхэм щыщхэр къы­хы­хьэурэ, хуэм-хуэмурэ зэфIэуващ ди къэралыр. 
Сыт мыхьэнэшхуэ зиIэр икIи нэхъ гъэщIэгъуэну абы хэтар? Сытыт нэхъыщхьэ дыдэр? Урысейм къыхыхьэ лъэпкъхэм къызэрымыкIуэ пщIэ зэры­хуащIырт, абыхэм я щэнхабзэмрэ я хабзэхэмрэ, я псэкупсэ лъапIэныгъэхэр зэралъытэрт. Абы къыхэкIыу, дэтхэнэми бгъэ­дэлъ хъугъуэфIыгъуэхэм, лIэ­щIыгъуэкIэрэ езыхэм яйм хуэдэу пщIэ хуащIу хъуащ. 
Я теплъэкIэ зэщхьэщокI лъэпкъ хабзэхэр - абыи мы­хьэ­нэшхуэ иIэщ, ар хъарзынэщ, ар хъумэн хуейщ, ауэ купщIэкIэ, лъабжьэкIэ а лъапIэныгъэхэр зэщхьщ. Урысейм ис лъэпкъ-хэм я зэкъуэтыныгъэм и илъэ­сыр къызэIудох. Сыныво­хъуэхъу!», - жиIащ Президентым. 
Махуэ псом къриубыдэу «Урысей» лъэпкъ центрым ­ще­кIуэкIащ къэрал лэжьакIуэ цIэ­рыIуэхэм, щIэныгъэлIхэм, щэн­хабзэм и лэжьакIуэхэм, спорт­сменхэм, Урысейм и лIы­хъужь­хэм я лекцэхэмрэ зэп­сэлъэныгъэ зэIухахэмрэ. 
Лекторхэмрэ щIалэгъуа­лэм­рэ я гулъытэр нэхъыбэу зытеу­хуар Урысейм ис лъэпкъхэм я зэкъуэтыныгъэм и мыхьэнэрщ, псоми я зэхуэдэ щэнхабзэ щIэ­инымрэ хабзэхэмрэщ, лIыгъэ зехьэнымрэ Хэкур хъумэ­ным­рэщ. Марафоным хыхьэу хьэ­щIэхэр хэтащ IэщIагъэлI цIэ­рыIуэхэм я нэIэм щIэту екIуэкIа творческэ, спортым, пщэ­фIэ­ным хухэха мастер-класс­хэм, Алтайм, Урысей Ищхъэрэм, Камчаткэм я щIыуэпсым, щэнхабзэм, тхыдэм теухуа документальнэ фильмхэр ягъэлъэгъуащ. 
ЦIыхубэ литературэмкIэ библиотекэм хьэщIэхэм щыгъуазэ зыщащIащ лъэпкъ зэмылIэу­жьыгъуэхэм я тхакIуэ цIэры­Iуэхэм я IэдакъэщIэкIхэм, «Урысейм и гастрономие картэ» ­проектым ипкъ иткIэ, пщафIэ гупыр щIалэгъуалэм яхутеп­сэ­лъыхьащ лъэпкъхэм я шхы­ныгъуэхэмрэ ерыскъыхэмрэ я гъэхьэзырыкIэм. 
УФ-м и щIыналъэ 89-ри «те­лелъэмыж» зэпыщIэ­ныгъэм­-кIэ хэтащ махуэшхуэр къыщы­зэIуахым иращIэкIа гуфIэгъуэ дауэдапщэм, Москва кIуащ Кавказ Ищхъэрэ федеральнэ щIыналъэм и хэгъэгу­хэм я лIыкIуэхэри. Къэбэрдей-Балъкъэрым и Iэтащхьэ КIуэ­кIуэ Казбек и унафэкIэ, ди республикэм щыщ гупышхуэ щы­Iащ къалащхьэм. ЩIалэ­гъуалэр жыджэру хэтащ ма­рафоным и кIуэцIкIэ къызэ­рагъэпэща Iуэхугъуэ псоми, апхуэдэуи Лъэпкъ центрым щыIуащ ди пшыналъэхэр, щагъэлъэгъуащ къафэхэр. 
Урысейм ис лъэпкъхэм я зэкъуэтыныгъэм и илъэсыр Iэтауэ къыщызэIуахым иращIэкIа ­концертышхуэм хэтащ къэралым и щIыналъэ ­псоми щыщ артистхэмрэ цIыху­бэ ансамблхэмрэ. 
Мы илъэсыр нэхъыщхьэу зытеухуар къэралым щыпсэу лъэпкъхэр нэхъ зэпэгъунэгъу, зэрылъытэ, зэкъуэт щIынырщ. Марафонми нэхъыбэу утыку къыщрахьар тхыдэм, щэнхабзэм, щIэинхэм я зэхэтыкIэрщ, хабзэхэр зэрызэпэгъунэгъу щхьэ­хуэныгъэхэрщ. ЩIыпIэ ­хэха еубыд Хэкум хуэлэжьэ­ным, зэкъуэтыныгъэм и иджы­рей щапхъэхэм. Ахэри щхьэ­хуэу къыщагъэлъэгъуащ зэ­хы­хьэм. Уеблэмэ Президентым къыхигъэщащ Урысейм ис лъэпкъхэм я лIыкIуэхэм я ­зэ­хуаку дэлъ псэкупсэ зэпэ­гъунэгъугъэмрэ пщIэ зэхуэ­щIы­нымрэ гъэбыдэнымкIэ а Iуэхугъуэм къалэн щхьэхуэ зэ­риIэр. 

НэщIэпыджэ Замирэ.