«Экстремизм бла терроризмге къажау – бирге» деген ат бла Нальчикни «Призвание» медицина колледжинде алгъаракълада жыйылыу къуралгъанды. Аны къаллай уллу магъанасы болгъанын акъылбалыкъ болмагъанланы ишлери жаны бла инспектор полицияны капитаны Ульяна Фёдорова ангылатып, келген къонакълагъа сёз бергенди.

- Бюгюн къаллай бир адам келгенди бери, сиз, бу тапсыз ишлеге къатышмай, окъууугъузну тынч-ырахат бардырлыгъыгъызны сюйюп. Терроризмни не дини, не миллети жокъду. Бир динде да айтылмайды тапсыз ишлеге къатышып, башхаланы, кесигизни да жашауларыгъызны бузугъуз деп. Билип къоюгъуз, экстремизмни аууна бир тюшсегиз, андан чыкъгъан бек къыйынды. Мында тынгылы билим алып, адамлагъа болушурча уста болсагъыз, алда сизни кёп ахшылыкъла сакълайдыла, – дегенди Россейни МВД-сыны Нальчик шахарда управлениясыны жамауат советини, КъМР-ни Парламентини жамауат советини къауумларына кирген Газайланы Масхут.
КъМР-ни Муслийманларыны дин управлениясыны таматасыны болушлукъчусу Анджела Амшукова жаш адамланы тынгылы билим алыргъа чакъыргъанды. Дагъыда шёндю къыйын ауругъан сабийлеге багъаргъа ахча жыйгъанла кёп болгъанларын айтып, танымагъанлагъа ахчаны ётдюрмезге кереклисин эсгертгенди.
– Бюгюн айтылгъан затланы эсге алсагъыз, тапсыз ишге къатышмазгъа боллукъсуз. Андан эсе огъурлу жумушлагъа къошулугъуз. Бизде кёп тюрлю проектле бардыла. Сёз ючюн, 22:00 сагъатдан сора сабийле эшикде айланмазларына къайгъырабыз, – дегенди «Биринчилени атламлары» битеуроссей биригиуню регион бёлюмюню тамата вожатыйы Камила Калажокова. 
Участкалы полициячы Ислам Старчевой жаш тёлю телефонла, Интернет бла да абаданладан иги кюреше билгенин чертди. «Сизден болушлукъ тилегенлени кеслери бла тюбеп, алай этигиз ол жумушну. Абаданлагъа да ангылатыгъыз, танымагъан адамлагъа жукъ жибермесинле», - деп къошханды.
Жыйылыуну ахырында Ульяна Фёдорова банк карточкаланы 10-15 минг сомгъа сатып алыу бла байламлы хыйлалыкъ кенг жыйылып баргъанын эсгертип: «Алдатмагъыз кесигизни, артда ала бла терроризмге ахча жибериледи», - деп ангылатханды.
Жаш адамла келген къонакълагъа соруула да бергендиле. Быллай тюбешиуню къурагъанлагъа ыспас да этгендиле.

Мамайланы Алий