Кёп болмай РФ-ни Правительствосуну Председателини орунбасары Дмитрий Чернышенко «Земский учитель» федерал программаны эсеплери бла шагъырейлендиргенди. Проект «Жаш адамла бла сабийле» миллет проектни чеклеринде бардырылады. Аны магъанасы гитче шахарла бла эллени устазла бла жалчытыргъады.   

Дмитрий Николаевич айтханнга кёре, къыралны айнытырыкъ амалладан бирине билим бериуню санаргъа боллукъду. Аны себепли къырал ол хар жерде да тийишли халда бардырылырына, сабийле иги билим алырларына дайым эс бурады. Анга кёре элледе ишлерге сюйген устазлагъа да себеплик тапдырылады.   
Аны бла байламлы былтыр конкурс бардырып, бош ишчи жерлени толтурургъа онг табылгъанды. Урунурукълагъа хакъ тёлерча федерал бюджетден 600 миллион сом чакълы бёлюннгенди. 
Быйылны юсюнден айтханда, ишчи жерлени саны эки кереге ёсерикди.  Алай бла 1216 устаз урунургъа онг табарыкъдыла, алагъа 1,18 миллиард сомдан артыкъ тёленирикди.   
Программаны чеклеринде Донецк бла Луганск халкъ республикалада, Запорожье бла Херсон областьлада эм Узакъ Востокда устазлагъа эки миллион сом тёленеди. Башха регионлада аны ёлчеми бир миллионнга жетеди. Аны бла бирге устазла жунчумаз, жашау журт бла жалчытылыныр ючюн да регионла кеслери болушлукъ тапдырыргъа керекдиле. 
РФ-ни Президентини буйругъу бла «Земский учитель» 2030 жылгъа дери созулгъанды. Къабарты-Малкъарны юсюнден айтханда, ол 2020 жылдан бери бардырылады. Аны хайыры бла мектепледе ишлерге 41 педагог тохташхандыла. Быйыл республикада – 18,  келир жылда уа 17 адам урунургъа онг табарыкъдыла. 
Былтыр конкурсну эсеплерине кёре ишлерге тогъуз устаз айырылгъандыла.Ала Прохладна, Чегем, Басхан эм  Май районлада иш бла жалчытылыннгандыла.
Бусагъатда кёбюсюнде  математикадан, ингилиз тилден, тарыхдан, биологиядан, орус тилден бла адабиятдан  эм гитче классланы окъутхан устазла изленедиле. 

Магометланы Сулейман