Адыгэбзэр, адыгэ хабзэр, щэнхабзэр хъу­мэным зи лэжьыгъэр теухуа «Адыгэ дуней» лъэпкъ фондым къызэригъэпэща «Сыринэ» ныбжьыщIэ адыгэ театр-студием иджыблагъэ утыку кърихьащ драматург, усакIуэ, «Жан» зэгухьэныгъэм и унафэщI, «Горянка» газетым и редактор нэхъыщхьэ Къаныкъуэ Заринэ и пьесэм къытращIыкIа «Унащхьэ» спектак-лыр. Ар игъэуващ Горький Максим и цIэр зезыхьэ Урыс къэрал драмэ театрым и ар-тист, режиссёр Къанкъул Ислъам.
 
Театрыр къызэрызэрагъэпэщрэ нэгъабэ илъэ­ситху ирикъуащ. «Сыринэ» театрым и ху­дожественнэ унафэщIыр икIи и режиссёрыр ­театрымрэ киномрэ я актёр Къанкъул Ис-                  лъамщ. Абы и репертуарым хэтщ Къаны­къуэ Заринэ и пьесэхэм къытращIыкIа «Унащхьэ», «КъежэкI», «МафIэгу» спектаклхэр. ­Театрым щыджэгу щIалэгъуалэр икIи йоджэ. ИлъэситI дэкIмэ, актёрхэм сертификатхэр къратыжынущ, театрым къэнэжынуи Iэмал яIэщ.
- ДэркIэ нэхъыщхьэр адыгэбзэкIэ дыджэгу­нырщ, сыту жыпIэмэ кIуэдыжынкIэ шынагъуэу къалъытэ бзэхэм адыгэбзэр ящыщщи. Къалэну зыхуэдгъэувыжар къыдэхъулIэуи къытщохъу. Спектаклым къекIуэлIа театреплъхэр абы адыгэбзэкIэ тепсэлъыхьыжу зэрызэхэпхыр гуа­пэщ. Гу лъыботэ театрым кIуэуэ зыублэхэм адыгэбзэкIэ псэлъэн зэрыщIадзэм. Ар куэд и ­уасэщ. «Унащхьэр» куэдым гунэс зэращыхъуам щIалэгъуалэм нэхъри зыкъызэкъуахыну тре­гъэгушхуэ, - жеIэ Къаныкъуэ Ислъам. - Абыхэм я ныбжьым хуэмыкIуэ ролхэр щагъэ­защIэм деж сфIэфIкъым. Псалъэм папщIэ, я адэхэм, анэхэм, анэшхуэхэм, гуащэмрэ ны­сэмрэ, зэ­щхьэгъусэхэм я зэхущытыкIэхэр къы­ща­гъэ­лъагъуэкIэ. Ар абыхэм я ролкъым. ЩIэб­лэм яку дэлъ зэхущытыкIэхэр, ахэр я адэ-анэмрэ егъэджакIуэхэмрэ къазэрыдекIуэкIырщ ягъэлъэ­гъуэну къезэгъыр. Налшык и утыкухэм къа­дэ­кIуэу, ди спектаклхэр респуб­ликэм и къуажэхэми щыдогъэлъагъуэ. Иджы­благъэ дыщыIащ Дзэлыкъуэ, Бахъсэн, Тэрч щIыналъэхэм, Къэрэшей-Шэрджэсым, Тыркум и къалэхэм. Театрым нэхъыбэрэ фыкIуэну, куп­щIэ зиIэ спектаклхэм феплъыну, тхылъыфI феджэну, щIэ зэвгъэлъагъуну фыкъыхузоджэ. Мыгувэу федгъэплъынущ Аброкъуэ ­Аслъэн и пьесэм къытращIыкIа «Къуажэ» спектаклым. 
ЩIэблэм уадэлэжьэну мытыншу къалъытэ-ми, Ислъам ар къехъулIэу жыпIэ хъунущ, дэтхэнэми бгъэдыхьэкIэ щхьэхуэ къазэры­хуи­гъуэтыфыр, ныбжьыщIэхэм пщIэ къызэры­хуащIыр, я дзыхь къызэрырагъэзыр нэрылъа­гъущи. Къанкъулым къызэрилъытэмкIэ, теат­­рым къакIуэ щIалэгъуалэр акъылыфIэщ, икIи ахэр иригъаджэ къудей мыхъуу, езыми абыхэм я деж щIэ куэд къыщещIэ.
Анэдэлъхубзэр зыгъэшэрыуэ адыгэ щIалэ­гъуалэ театрыр утыкум зэрыщыджэгум укIэ­лъыплъыныр гур хэзыгъахъуэт, удэзыхьэхт. Илъэс 14-16 зи ныбжь щIалэхэмрэ хъыджэбзхэмрэ тегушхуауэ театр утыкум щыджэгуащ. КъыжыIапхъэщ, спектаклым цIыхушхуэ зэ­ры­зэ­хуишэсар, тIысыпIэншэу куэдыр къэнауэ. 
Пьесэр зытха Къаныкъуэ Заринэ фIыуэ зы­щигъэгъуэзащ иджырей ныбжьыщIэхэм я дунейм. Лэжьыгъэм лъабжьэ хуэхъуар щIалэ­гъуалэм я гъащIэрщ, я зэхущытыкIэрщ, яку  дэлъ гурыгъу-гурыщIэхэрщ, дэзыхьэх Iуэху­гъуэхэрщ, зрихьэлIэ Iуэху зэIумыбзхэрщ. Iуэхур щекIуэкIыр дращIейуэ намыгъэсу къагъэнэжа унэ зэтет бгынэжахэм ящыщ зым и унащхьэрщ. Ар еджакIуэхэм я зэхуэзапIэ, зэпсэлъапIэ, нэгу зегъэужьыпIэ къудей мыхъуу, абы я классэгъу Ясминэ къехуэхыу зэриукIар лэжьыгъэм Iуданэ плъыжьу щыпхышащ. Гузэвэгъуэр къызэры­хъуар езы ныбжьыщIэхэм зэхагъэкIыну зэгуроIуэри, унащхьэм щызэхуос. Интернет сайтым ди­хьэха зэныбжьэгъу хъыджэбзхэм зэры­мыщIэкIэ ар «эфир занщIэм» ягъакIуэ. Абдеж Ясминэ хэт сыт хуэдэу хущытами щытопсэ-лъыхь, дэтхэнэ зым и хьэл-щэнри «зэры­мыщIэкIэ» наIуэ къыщохъу. А щIыкIэм тету псори щыгъуазэ мэхъу хъыджэбз цIыкIур унащхьэм къехуэха зэрыхъуам.
Псом хуэмыдэу лэжьыгъэм IупщIу къыщыгъэлъэгъуащ языныкъуэ щIалэгъуалэр соци­альнэ сетхэм дахьэх къудей мыхъуу, «сымаджэ» ирихъупаи зэрахэтыр. Интернетым ит­хьэкъуа ныбжьыщIэхэр спектаклым зэрызригъэплъыжам шэч хэлъкъым. Хэт ищIэрэ, дерс къыхахынкIэ хъунщ. 
- ЕджапIэм дыщыщIэса зэманымрэ нобэмрэ зэплъытмэ, зэхъуэкIыныгъэшхуэхэр къэ­хъуащ, иджырей технологиехэр, социальнэ сет­хэр ди гъащIэм къыгуэхыпIэ имыIэу къы­хыхьэ­ри. Псори дызэныбжьэгъуу, дызэрылъытэу, дызэрылъагъуу, школым ди гъащIэр епхауэ дыкъыщIекIуэкIари аращ, - жиIащ Къаныкъуэ Заринэ. - Тхылъ деджэну тфIэфIт, уэрэдыр ди ­ха­мэтэкъым, щIыпIэ дахэхэм зыплъыхьакIуэ дыкIуэурэ зыдгъэпсэхурт. Хэт ищIэрэ, мы лэжьыгъэм иджырей щIалэгъуалэр зыщIигъэгупсы­сыжынкIи хъунщ.
«Сыринэ» ныбжьыщIэ театр-студием, абы и режиссёр Къанкъул Ислъам, пьесэр зытха ­Къаныкъуэ Заринэ сымэ гугъэ уагъэщI щIэблэм анэдэлъхубзэм я гупэр хуагъэзэжынымкIэ щхьэпэну, адыгэ театрыр щIалэгъуалэ кIуапIэ хъужыным яхузэфIэкI хэлъхьэныгъэ хуащIыну! «Сыринэ» театрым и лэжьыгъэхэр къыщыв­гъуэтынущ щIэупщIэ зиIэ «Дыгъэ бзий» адыгэ онлайн-театрым. ГъащIэм теухуа теплъэгъуэ­хэмрэ гушыIэхэмрэ, фильм кIэщIхэр - дэрэжэ­гъуэ къывэзытын куэд къыщыфпоплъэ абы. 

ТЕКIУЖЬ  Заретэ.