Бахъсэн районым хыхьэ Жанхъуэтекъуэ къуажэм и курыт еджапIэм къыщызэIуахащ адыгэхэмрэ балъкъэрхэмрэ къагъэсэбэпу щыта пасэрей хьэпшыпхэм я музей.
Музейр къызэгъэпэщыныр зи жэрдэмри абы и хъумакIуэ нэхъыщхьэри щэнхабзэм и лэжьакIуэ БатIитIэ Мухьэмэдщ. Пасэрей хьэпшыпхэр абы илъэс куэдкIэ зэхуихьэсащ, уеблэмэ ахэм яхэлъщ археологие къэхутэныгъэхэм я фIыгъэкIэ хыхьэу къагъуэта артефактхэри. Мухьэмэд ныбжьыщIэхэм хьэпшыпхэр яригъэлъагъу къудейкъым, атIэ сабийхэр щегъэгъуазэ пасэрей IэщIагъэхэм, псалъэм папщIэ, арджэн зэращIым. Мухьэмэд зэрыжиIэмкIэ, нэхъыщхьэр лъэпкъ тхыдэмрэ хабзэхэмрэ хъумэнырщ, иджырей щIалэгъуалэр абы щIэпIыкIынырщ.
- Си къалэн нэхъыщхьэу къызолъытэ Къэбэрдей-Балъкъэрым щыпсэу сабийхэр къызыхэкIам, я лъабжьэм щыгъуазэу, пщIэ хуащIу къэгъэхъуныр, - жеIэ БатIитIэ Мухьэмэд. – Лъэпкъым къыддекIуэкI щэнхабзэ хъугъуэфIыгъуэхэми ныбжьыщIэхэр щIэпIыкIын хуейщ, пасэрей IэщIагъэхэр тхъумэжын папщIэ.
Курыт еджапIэм и унафэщI Геккиевэ Нуржан БатIитIэ Мухьэмэд къыхилъхьа Iуэхум арэзы техъуэри, икIи хьэпшыпхэр щахъумэну пэш къритащи, иджы къуажэдэс ини цIыкIуи музейм йокIуалIэр. Абы щокIуэкI щIэблэм я хэкур, я щIыналъэр фIыуэ ялъагъуу, я хабзэхэм пщIэ хуащIу къэхъуным теухуа зэхыхьэхэр. КъинэмыщIауэ, музейм и лэжьакIуэхэм къуажэдэсхэм яхуэщхьэпэн зэIущIэхэри къызэрагъэпэщ. Мы лэжьыгъэр щыхьэт тохъуэ къуажэдэсхэм я къарукIэ къызэрызэбгъэпэщыфынум щIалэгъуалэм, жылагъуэм гъэщIэгъуэн ящыхъун щэнхабзэ Iуэху.
ТЕКIУЖЬ Заретэ.
