Налшык дэт Сабийхэмрэ ныбжьыщIэхэмрэ я творчест­вэмкIэ я унэм щекIуэкIащ «Урыс географие зэгухьэныгъэм» и Къэбэрдей-Балъкъэр къудамэм илъэсым къриубыдэу щалэжьахэр къыщапщытэжа, мурадыщIэхэри щагъэбелджыла зэIущIэ. Iуэхур ирырагъэхьэлIащ Урыс географие зэгухьэныгъэр къызэрызэрагъэпэщрэ илъэси 180-рэ зэрыри­къумрэ ди республикэм абы и къудамэ къызэрыщызэIуахрэ илъэс 45-рэ зэрыхъумрэ.
ЗэIущIэм хэтащ къу­лы­къущIэхэр, жылагъуэ лэ­жьакIуэхэр, щIалэгъуалэ пэрытхэр. Ахэр тепсэлъыхьащ ягъэзэщIахэм, щIэныгъэ лэжьыгъэхэм, щIалэгъуалэм папщIэ къызэрагъэпэща Iуэхухэм, нэгъуэщIхэми. Лъахэр къэхутэныр, щIыуэпсыр хъумэныр, дунейм и щэхухэр къэтIэщIыныр, ­джыныр - куэд къызэщIиубыдащ зэгухьэныгъэм хэтхэм я IуэхущIафэм. 
«Урыс географие зэгухьэныгъэм» Къэбэрдей-Балъкъэрым щиIэ и къудамэм щIыналъэм Iуэху куэд зэрыщилэжьыр зэIущIэм къыщыха­гъэщащ. Псом хуэмыдэу щхьэпэщ, курыт еджапIэм щIэсхэмрэ студентхэмрэ ди щIыуэпсыр хъумэным зэрыдрагъэхьэхыр, абы и тхыдэм теухуауэ щIэщыгъуэ куэд зэрырагъащIэр, щIыпIэ дахэхэм щIалэгъуалэм зэры­зыщра­гъэплъыхьыр. 
ГУГЪУЭТ Заремэ.