Къафэ екIу, уэрэд гуа­кIуэ, Iэгуауэ, цIыху нэ­фIэгуфIэхэр. Мы псалъэ­хэмкIэ кърибгъэлъэгъуэж хъуну къыщIэкIынщ Налшык дэт Къэрал киноконцерт гъэлъэгъуапIэм Дунейпсо Арт комитетым къыщызэригъэпэща пшыхьыр. 

Ар къызэIуахащ Осетие Ипщэм щIыхь зиIэ и артист Уэзрокъуэ Чэрим, уэрэджыIакIуэ Чабдаровэ Алёнэ, КъБР-м щэнхабзэмкIэ щIыхь зиIэ и лэжьакIуэ Куэшей Алик зи унафэщI «Нал цIыкIу» къэфакIуэ гупым. Мы Iуэхур пшыхь къудейтэкъым, атIэ республикэм и IэнатIэ зэмылIэужьыгъуэхэм зи гуащIэ емыблэжу Iутхэр абы щагъэлъапIэрт. «Сердце отдаю детям», «ГущIэгъум, гуапагъэм, псапэм папщIэ» дунейпсо дыщэ орденхэмрэ Гамзатов Расул илъэси 100 щрикъум къыдагъэкIа дыщэ орденымрэ хуагъэфэщащ IэщIагъэ нэхъыщхьэ дыдэхэм хабжэ егъэджэныгъэмрэ медицинэмрэ, щIэныгъэмрэ гъуазджэмрэ зезыгъэужьхэм. 
Къызэхуэсахэм защыхуигъазэм, Дунейпсо Арт комитетым и япэ вице-президент, академик, ЮНЕСКО-м щэнхабзэмрэ егъэджэныгъэ IуэхухэмкIэ хэт, Кавказ Ищхъэрэм и щIыналъэ псоми гъуазджэхэмкIэ щIыхь зиIэ я лэжьакIуэ Бейтыгъуэн Iэуес жиIащ: «Хабзэ дахэ зэрыхъуауэ, илъэсым кърикIуар къызэщIыдокъуэж, жылагъуэр егъэфIэкIуэным хэлъхьэныгъэ хуэзыщIхэр догъэлъапIэ. Ди щIэблэр гъэсэным, ди къэралышхуэм щыпсэу лъэпкъхэм я зэныбжьэгъугъэр гъэбыдэным абыхэм хэлъхьэныгъэ хуащIыр уасэ зимыIэщ. Дэ ди мурад нэхъыщхьэр ди хъугъуэфIыгъуэхэр хъумэнымрэ егъэфIэкIуэнымрэщ. Аращ цIыхухэр дызэзышалIэр. Лъэпкъхэм ди зэныбжьэгъу­гъэр, зэкъуэтыныгъэр нэхъ быдэ ирехъу!»
Пшыхьым хьэщIэ лъапIэхэри кърагъэблэгъат, Пензэ щIы­налъэм, Къэрэшей-Шэрджэсым, Дагъыстэным, Осетие Ищхъэрэ-Аланием, Ингушым къикIауэ. Пензэ щIыналъэм и губернатор Мельниченкэ Олег и фIэхъус тхыгъэрэ я щIыпIэм къыщыдагъэкI сыхьэткIэ къыхуэупсащ Iуэхум и къызэгъэпэщакIуэ Бейты­гъуэн Iэуес. Бысымми и хьэ­щIэ­хэр игъэлъэпIащ комитетым и дамыгъэхэмкIэ: Пензэ къэрал университетым Дунейпсо зэдэлэжьэныгъэмкIэ и институтым и унафэщI, юридическэ щIэныгъэхэмкIэ доктор, профессор Синцов Глеб «Сердце отдаю детям» дыщэ медалыр иритащ, Проториерей, Пензэ псэкупсэ еджапIэм (Урыс Православнэ Члисэм и Пензэ Епархием) и ректор Грошев Николай - «ПщIэ зиIэ гъэсакIуэ» цIэ лъагэр. Бейтыгъуэн Iэуес къыхигъэщащ щIыналъэхэм я зэпыщIэныгъэхэр дяпэ­кIи ирагъэфIэкIуэну, зэкIэ­лъыкIуэну зэригуапэр.
КъБР-м и Парламентым и комитетым и унафэщI Къумал Заурбэч жиIащ: «Дунейпсо Арт комитетым икъукIэ лэжьыгъэ щхьэпэ ищIэу къызолъытэ, псом хуэмыдэу щIыналъэхэм я зэпыщIэныгъэмрэ зэныбжьэгъугъэмрэ егъэфIэкIуэным ехьэлIауэ. Мы пшыхьыр абы и щыхьэтщ. Егъэджэныгъэ IэнатIэ ирехъу, узыншагъэр хъумэн, щIэныгъэ, щэнхабзэ, спорт Iуэхуу щрети, цIыхум и лэжьыгъэм пщIэ зэриIэр, ар къызэралъытэр егъэ­лъэ­гъуным мыхьэнэшхуэ иIэщ. Фи гуащIэдэкIыр мыкIуэщIу адэкIи ехъулIэныгъэхэр фиIэну псоми сынывохъуэхъу».
- Мыпхуэдэ зэхыхьэхэм я мыхьэнэр псом япэу дызэрызэкъуигъэувэрауэ къызолъытэ. Зи IуэхущIафэр нэсу езыхьэкI­­хэм нобэ дигуми ди псэми къабгъэ­дэкIыу дынывохъуэхъу. Илъэ­сыщIэм мамырыгъэ, гупсэхугъуэ, текIуэныгъэ псоми къытхуи­хьыну дыпоплъэ, - пищащ КъБР-м и Жыла­гъуэ палатэм ­социальнэ IуэхухэмкIэ, узыншагъэр хъумэнымкIэ, физи­ческэ щэнхабзэмрэ спортымкIэ и комиссэм и унафэщI, КъБР-м щэнхабзэмкIэ щIыхь зиIэ и лэжьакIуэ Шинкарёвэ Наталье.
Пшыхьым дамыгъэ лъа­пIэхэр щратыжащ ахэр зы­хуагъэфэща цIыху 35-м. Ди ­гуапэ зэрыхъущи, абыхэм яхэтщ «Адыгэ псалъэ» газетым и редактор нэхъыщхьэ Жыласэ Заурбэч. Абы къыхуагъэфэщащ Гамзатов Расул илъэси 100 щрикъум ирихьэлIэу къыдагъэкIа дыщэ орденыр.
«Сердце отдаю детям» дунейпсо дыщэ орденыр зратахэм ящыщщ Къэбэрдей-Балъкъэрым Гуманитар къэхутэныгъэхэмкIэ и институтым и унафэщI, профессор Дзэмыхь Къасболэт, КъБР-м и Парламентым ЕгъэджэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ и комитетым и унафэщIым и къуэдзэ, Урысейм щIыхь зиIэ и тренер Ахъмэт Амир сымэ.
«1991 гъэ лъандэрэ Дунейпсо Арт комитетым лэжьыгъэшхуэ зэфIигъэкIыу къогъуэгурыкIуэ. Мы IуэхущIапIэм и къалэн нэхъыщхьэр къохъулIэ: лъэпкъ щэнхабзэхэр хъумэнымрэ цIыхухэр, лъэпкъхэр гъунэгъу зэхуэщIын, зэпыщIэн жыхуэтIэмрэ. Ди къэралым мы зэманым абыхэм мыхьэнэшхуэ щаIэщ. СэркIи сызиунафэщI IуэхущIапIэм и дежкIи икъукIэ гулъытэ гуапэ къытхуащIауэ къызолъытэ», - жиIащ Дзэмыхьым. Абы Бейтыгъуэн Iэуес иригъэкIуэкI лэжьыгъэр зэрыиныр къыхи­гъэщри, иджыблагъэ томиплIу зэхэту къыдагъэкIа «Нартхэр. Адыгэ эпос» тхылъышхуэр щIэныгъэлIхэм къабгъэдэкIыу тыгъэ хуищIащ.
«IэщIагъэ зэхуэмыдэхэм пэрытхэр нобэ зэхуишэсащ мы Iуэхум. Дэ зы гупсысэм дызэкъуегъэувэ - ди щIыналъэр, къэралыр нэхъ лъэщ, цIыхухэм я псэукIэр нэхъыфI ящыщIын зэрыхуейм. ЕгъэджакIуэми, дохутырми, гъэсакIуэми, къапщтэмэ, сыт хуэдэ IэщIагъэми и лъабжьэр - щIэблэ узыншэ къыдэгъэкIуэтеинырщ. Нобэ къытхуащIа гулъытэм хуэдэхэм нэхъри утрагъэгушхуэ ди пщэрылъхэр жэуаплыныгъэ пылъу адэкIи зэрыдгъэзэщIэным», - къыхигъэщащ Ахъмэтым. 
Пшыхьыр ягъэдэхащ КъБР-м и Музыкэ театрым и уэрэджыIакIуэ Балъкъыз Гюльшахрэ дунейпсо зэхьэзэхуэ куэдым я лауреат Балъкъыз Тимуррэ, уэрэджыIакIуэ ШащIэ Маринэ, Соттаев Къанщауэ и цIэр зезыхьэ «Эльбрус» къэфакIуэ гупым, нэгъуэщIхэми.
БАГЪЭТЫР Луизэ.
Сурэтхэр
Къарей Элинэ трихащ.