Россейни Конституциясыны кюнюнде КъМР-де Ич ишле министерствода къууанчлы жыйылыу болгъанды. Ол кюн окъууда, спортда, жамауат жашауда алчы жашланы  бла къызланы чакъырып, алагъа Россейни инсаныны паспортун бергендиле.  Белгиленнгенлени араларында Нальчикни 7-чи номерли школунда полицияны кадет классыны курсантлары да бар эдиле. 
Аланы ич ишлени  министри полицияны генерал-лейтенанты Вячеслав Крючков алгъышлагъанды. Ол паспорт жаш адамлагъа жашаугъа  кенг жолла  ачханын белгилегенди. «Сизни хар атламыгъыз, хар  ишигиз да магъаналыдыла. Оноуларыгъыз,  муратларыгъыз да мындан ары Ата журтубузну айнытыу бла байламлы болгъанларын унутмагъыз»,-дегенди ол.
Россейни жангы инсанларын КъМР-де МВД-да жамауат советни башчысы   Руслан Макушев, «Биринчилени атламлары» жаш тёлю биригиуню регион бёлюмюню башчысы Аслан Шипшев эм башхала алгъышлагъандыла. 
Кадетле  кёргюзтген концерт программа уа  жыйылыуну бютюнда жарыкъ этгенди,  КъМР-де МВД-ны маданият арасыны келечиси Фатима Дышекованы «Матушка Земля» жырны айтханына барысы да бюсюреп, къарсла ургъандыла. 
- Бу жарыкъ кюн жаш адамланы  эслеринде кёпге къалырына, ала кеслерини инсанлыкъ борчларына тюшюнюрлерине  ышанабыз, дегендиле бизге ведомствону пресс-службасындан.

Тикаланы Фатима хазырлагъанды.