Мэзкуу къалэм киокусинкай-каратэмкIэ зэхьэзэхуэ зыбжанэ зэуэ щекIуэкIащ мы махуэхэм. ЖыпIэнурамэ, щIалэгъуалэм я деж пашэныгъэр къыщыхьыным хуэунэтIа зэIущIэ, балигъхэм (щIалэхэми хъыджэбзхэми) я чемпионат, «Къалащхьэм и Кубок» зэпеуэ. Иужьрейм щызэхуэзахэр ныбжьыщIэхэрщ.
Балигъхэм я чемпионатыр къызэрыхахыу щытащ: абы щытекIуахэр хэтынущ «Moscow Open» дунейпсо зэхьэзэхуэм икIи, ди гуапэ зэрыхъущи, Къэбэрдей-Балъкъэрым и спортсмен Сыжажэ Алихъан и хьэлъагъ елъытауэ зыхэта гупым япэ увыпIэр къыщихьащ.
Мыпхуэдэ утыкушхуэм ди щIалэр япэу щытекIуауэ аращ. Абы и тренерыр Насыплы ТIэхьирщ.
Къыхэдгъэщынщи, абы щызэпеуащ ди къэралым и щIыналъэ куэдым я спортсмену 400-м щIигъу, абыхэм ящыщу тIур Къэбэрдей-Балъкъэрым икIауэ.
Ди гимнастхэр къыхожаныкI
«Гимнастикэм и лигэ» фIэщыгъэр зэрихьэу урысейпсо зэхьэзэхуэ Мэзкуу къалэм щекIуэкIащ иджыблагъэ. Абы щызэпеуащ къэралым и щIыналъэ куэдым я спортсмену 2000-м нэблагъэ.
Къэбэрдей-Балъкъэрым и щIыхьыр яIэту зэхьэзэхуэм щыIащ КъБР-м СпортымкIэ и министерствэм и спорт еджапIэм и гъэсэну цIыхуипщI икIи гупхэм я зэпеуэм етIуанэ увыпIэр къыщахьащ. Абы хэтащ Цой Iэдэм, Филатов Георгий, Иванов Максим, Артюхов Богдан, Къэжэр Амир сымэ.
Щхьэзакъуэ зэпеуэхэм езанэ разряд зиIэхэм ныбжьыщIэм я деж ещанэ увыпIэхэр къыщахьащ Батыр Денизэ, Цой Евэ, Блий Миллисэ сымэ. ЕтIуанэ разряд зиIэхэм я деж многоборьемкIэ дыщэ медаль къыщихьащ Бэч Арианнэ.
Ди командэм ядэлажьэр Щоджэн Теймураз, Терьяковэ Эллэ, Продуновэ-Исметовэ Еленэ сымэщ.
БЭБЭЧ Башир.
