Шимал Кавказда  «Ломоносовский обоз. Сила в смысле» деген ат бла сейирлик жарыкъландырыу проект бардырылгъанды. Анга кёре, Россейни тюрлю-тюрлю регионларындан  жаш лекторла, республикалагъа, крайлагъа, шахарлагъа, эллеге барып, лекцияла окъуйдула, оюнла, тренингле эмда семинарла бардыргъандыла.

Проектни Россейни Миллетлени ишлери жаны бла федерациясы эмда  Россейни халкъларыны юйю   РФ-ни Жарыкъландырыу министерствосуну себеплиги бла бардырадыла. Анга 2025 жылны ичинде  14 мингден аслам адам очно эмда 13  мингнге жууугъу уа  онлайн амал бла къошулгъандыла.

Проектни баш борчлары -  жаш тёлюню арасында  миллетлени эмда культураланы бирикдириу, россейли ниет байлыкъны айнытыу, асламлагъа туура этиу, экстремизмге, терроризмге биригип къажау сюелиу, патриот ниетлиликни кючлендириу, дагъыда башхала.

Юг Федерал округда лекцияла Луганск  эмда Донец халкъ республикалада, Запорожье эмда Херсон областьлада, Къырым Республикада, СКФО-ну жеринде уа – Ставрополь крайда, Къарачай-Черкес, Къабарты-Малкъар, Шимал Осетия-Алания, Ингушетия, Чечен эмда Дагъыстан республикалада окъулгъандыла.  Аланы темалары кёп тюрлюдюле: юйюрню даражасы, коммуникациялы тыйгъычланы хорлай билиу, дунияда бола тургъан ишлеге кёз къарам, адамны жашау болумун спортну юсю бла игилендириу, битеу бу ишледе  асламлы информация органланы  эмда социал сетьлени борчлары, тамата класслада окъугъанла  эмда студентле бла  ишлеу, дагъыда башхала.

Узакъ элледе болуп, экспертле  мектеплени, колледжлени устазлары, директорлары бла шагъырейленнгендиле, Кавказда уа  эсде да болмай тургъанлай, сейирлик  этнокультура ишлеге эмда фестивальлагъа тюбегендиле, кеслери да алагъа тири къатышхандыла, миллетлени жашау халларыны энчиликлерин кёргендиле.

Лектор жолоучулукъну  къурагъанла айтханнга кёре, алагъа  къайда да жарыкъ тюбегендиле. Ол зат ючюн а энчи бюсюреу, ыспас да этерге керекди. Директорла, преподавательле, окъуучула эмда аланы ата-аналары да унутулмазлыкъ къонакъбайлыкъ этгендиле. Сёзсюз, ол тюрлю иш лекторланы эслеринде ёмюрге къаллыкъды.

Лекцияладан сора да, хар регионда министерстволаны, ведомстволаны  келечилери бла тюбешиуле, жыйылыула да болгъандыла. Алада быллай лектор окъууланы дайым да бардырып турургъа кереклиси чертилгенди.

Аны бла бирге субъектлени келечилери лекциялы материалланы жер- жерледе ишлеген устазлагъа эмда педагоглагъа берирлерин да тилегендиле. «Сила в смысле» проект алай бла жангы жашау кюч аллыкъды, деген оюмларын да айтхандыла.

«Биз лекторланы командасы бла бирге  Россейни къыбыла жанында жашагъан жаш тёлюге деп  уллу иш тындыргъанбыз, аланы кёп сорууларына жууапла бергенбиз,- дегенди  проектни башчысы Владимир Скрипниченко. - 2025 жылда башланнган бу проект кесини ишин жетишимли бошагъанына бир тюрлю ишегим жокъду. Аны эсеплерине тийишлиликде биз, 2026 жылда РФ-ни субъектлеринде  ишлеген  устазла, директорла эмда директорланы орунбасарлары  бла  бютюнда терен эмда терк-терк тюбеше турурча план жарашдыргъанбыз».

Проектни юсюнден толу билдириуню https://lomoclub.ru/sila. сайтда окъургъа боллукъду.

Холаланы Марзият.