Кёп болмай Нальчикде «Мени СКФО-да бизнесим 2025» эм «Мени бизнесде атламым КъМР 2025» деген форумла ётгендиле. Аланы Къабарты-Малкъарны Экономиканы айнытыу министерствосу эмда республиканы «Мени бизнесим» арасы бардыргъандыла. Бу форумлагъа кеслери иш къурап къармашханла, предпринимательле, бизнесге себеплик этиу бла кюрешген организацияла, дагъыда региондан эмда тышындан экспертле къатышхандыла, деп билдиргендиле Экономиканы айнытыу министерствосундан.

Биринчи форумну иши магъаналы ушакъдан башланнганды. Аны кезиуюнде экспертле эмда къонакъла гитче эмда орта предпринимательствогъа билеклик этиу жумушда къырал бла бизнес бирге къалай ишлегенлерини юсюнден хапарлагъандыла. Оюмларын сагъынылгъан Араны, КъМР-ни Эл мюлк министерствосуну, КъМР-ни айнытыу Корпорацияны, регионну Сатыу-алыу – Промышленность палатасыны келечилери да туура этгендиле.

Форумну чеклеринде тышындан келген жети эксперт да сёлешип, бизнесни айнытыу жаны бла сынамлары бла шагъырейлендиргендиле жыйылгъанланы. Ала кётюрген темаланы ичинде была бар эдиле: къыйматлы коммуникацияла, ишге кёл салыу, налог законодательствода тюрлениуле, экспорт бла кюрешгенлеге къырал болушлукъ бериу. Энчи бренд къураугъа, электрон сатыу-алыу жерлеге чыгъыугъа, промышленность предприятияланы онгдуруугъа бютюнда уллу эс бурулгъанды.

Экинчи кюн а бизнес ушакъ бардырылгъанды; анга къатышханла КъМР-ни аз ёлчемли кредитле берген эмда Гарантияла фондларыны, Бизнес-инкубаторну, айнытыу Корпорацияны келечилеринден хайырлы информация эшитгендиле. Ол санда ахчаны электрон халда кёчюрюуню, туризмде жетишимли болууну, социал бизнес бардырыуну, шёндюгю цифралы амалланы юслеринден да айтылгъан эди.

Форумла ётген залны къатында къолдан усталаны кёрмючю да къуралгъанды.

Улбашланы Мурат хазырлагъанды.