Адыгэ литературэм и ­лъабжьэгъэтIылъ ЩоджэнцIыкIу Алий къызэралъхурэ илъэси 125-рэ зэрырикъум  и щIыхькIэ «Уэрэдыр и кIэм нэмысу» зыфIаща марафон-зэпеуэ щрагъэкIуэ-кIащ Бахъсэнёнкэ къуажэм    Щэн­хабзэмкIэ и унэм. Ар ­къы­зэригъэпэщащ Бахъсэн щIы­­налъэм щэнхабзэмкIэ и центрым и методист нэхъыжь, КъБР-м щэнхабзэмкIэ щIыхь зиIэ и лэжьакIуэ, усакIуэ Зэгъэщтокъуэ Людэ. 

ЩоджэнцIыкIу Алий и гъащIэм, и IэдакъэщIэкIхэм, еджапIэ зэрыщыIам, нэ­гъуэщI Iуэхугъуэхэми ятеухуа Iуэхугъуэхэм пэджэжынымкIэ, усэ къеджэнымкIэ, теп­лъэ­­гъуэ гъэлъэгъуэнымкIэ зэпе­уащ ныбжьыщIэ­хэр. Ар ира­гъэ­кIуэ­кIащ къуажэм дэт   лъахэхутэ музейм и уна- фэщI Шакъ Миланэрэ ГъуазджэхэмкIэ сабий школым и  уна­фэ­щIым и къуэдзэ Къэ-жэр Зурьянэрэ. 
- Адыгэ лъэпкъыр дызэ­ры­гушхуэ усакIуэшхуэ Що­джэн­цIыкIу Алий къызэралъхурэ мы гъэм илъэси 125-рэ ­ирокъу. УсакIуэшхуэр ноби тщIыгъущ, ар псэу хуэдэщ, и тхыгъэхэр уахътыншэщи. Зи уэ­рэдыр и кIэм нэмыса уса­кIуэ щэджащэм и сатырхэм къе­джэнущ, абы и гъащIэ гъуэ­гуанэм и напэкIуэцIхэр къы­зэIуа­хы­жынущ ди еджа­кIуэ цIыкIу­хэм, - жиIащ Къэжэр Зурьянэ. 
- ЩоджэнцIыкIу Алий и усэ са­тырхэр гукIэ дощIэ, тфIэфIщ, гупсысэ къахыдох. Нобэ екIуэкI мы Iуэхугъуэми къегъэлъагъуэ и тхыгъэхэм зэи ух зэрамыIэнур! - къыпещэ Шыкъ Миланэ. 
ГупиплIым я зэфIэкIыр ­къапщытащ ЩоджэнцIыкIу Алий и цIэр зезыхьэ псапа-щIэ фондым и унафэщI Що­джэнцIыкIу Леонид, Бахъсэн районым ЩэнхабзэмкIэ и унэм и унафэщI Къардэн ­Марат, «Адыгэ псалъэ» га­зетым и корреспондент Гу­гъуэт Заремэ, Бахъсэн райо­ным щэнхабзэмкIэ и уп­рав­ленэм и IэщIагъэлI нэхъы­щхьэ Къарэмырзэ Людэ, Бахъсэн районым и библиотекэ системэм и методист ЛIыгуащIэ Эльвирэ. Къэп­щы­такIуэ гупым я унафэщIащ Урысейм и ТхакIуэхэм я зэгу­хьэныгъэм и Къэбэрдей-­Балъкъэр къудамэм и уна-фэ­щIым и къуэдзэ Мэрем­къул Ларисэ. 
НыбжьыщIэхэр унэтIыны­гъиплI­кIэ зэпеуащ: къэп­щытакIуэхэм зыкърагъэ­цIы-хуу я пащхьэм зыкъыщагъэ­лъэгъуащ, гуп къэс ЩоджэнцIыкIу Алий теухуа упщIэ зыбжанэм жэуап иратащ, абыхэм я пашэхэр щхьэхуэу упщIэ-жэуапкIэ зэпеуащ, ныб­жьыщIэхэр гъэхуауэ усэ къызэреджэфыр наIуэ къащIащ, ЩоджэнцIыкIум и ­тхыгъэхэм тращIыкIа теп­лъэгъуэхэр ягъэлъэгъуащ. Къэп­щытакIуэ гупым увы­пIэ­хэр щагуэшым къалъытащ ныбжьыщIэхэм я утыку иты­кIэр, фащэр, гуп къэс игъэ­хьэзыра дамыгъэр, усэр зэ­рызыхащIэр, утыкур зэпэщ зэращIар, анэ­дэлъхубзэр зэ­рагъэшэрыуэр. 
ТекIуэныгъэр (Гран-при) ­ялъысащ ПсыкIэху къуажэм ЩэнхабзэмкIэ и унэм и лIы­кIуэхэм - «НыбжьыщIэ ха- хуэ» гупым. Япэ увыпIэр ­къахьащ «Лъэпкъым и  макъ» зыфIэ­зыщахэм, ахэр Бахъ­сэнёнкэ къуажэм дэт курыт еджапIэ №3-м щIэсщ. ЕтIуанэ ­хъуащ Кышпэк къуа­жэм ­Щэн­хабзэмкIэ и унэм ­къикIа «Шыхулъагъуэ» гу­-пыр. Баксанёнкэ къуажэм ­ дэт етIуанэ курыт еджапIэм щыщ «Нур» гупым ещанэ увыпIэр къахьащ. Абыхэм  гулъытэ хуа­щIащ къэп­щы­такIуэхэм я фIыщIэ тхылъ- кIи. 
ЩоджэнцIыкIу Алий и цIэр зезыхьэ псапащIэ фондым фIыщIэ тхылъхэр яхуигъэфэщащ зэпеуэм хэта гупхэр ­зыгъэхьэзыра гъэсакIуэхэм-рэ егъэджакIуэхэмрэ: Лу Заретэ, Багъ Сюзаннэ, Бжэны-кIэ Маринэ, Хьэтэжьыкъуэ Ларисэ сымэ. 
- НыбжьыщIэхэм зыкъызэ­рыв­гъэлъэгъуар дигу ды­хьащ, ауэ гугъу дригъэхьащ увыпIэхэр гуэшыным. Псом нэхъыщхьэращи, адыгэбзэр дахэу фогъэшэрыуэ. Фэри, фызыгъасэ адэ-анэхэми, егъэджакIуэхэми фIы­щIэш­хуэ фхудощI. Къэбэрдей-Балъкъэрым и ТхакIуэ-хэм я союзым къыбгъэдэ-кIыу сынывохъуэхъу нобэ екIуу зыкъызэрывгъэлъэ­гъуамкIэ. Мы Iуэху дахэм и фIыгъэкIэ нэхъри зыщывгъэгъуэзащ ЩоджэнцIыкIу Алий  и тхыгъэхэм. Зэпеуэм хэта дэтхэнэ гупми фхуэфащэщ текIуэныгъэ, абы шэч къытев­мыхьэ. Ауэ, къэпщытакIуэ гупым цIыху зытхух дыщыхэткIэ, балл бжы­гъэхэр дгъэуващ, ахэр зэхэтлъхьэжу ­къэдбжыжын хуей хъуащ. Абы къикIыркъым псоми зы гупыр нэхъ къыхэдгъэщхьэхукIауэ, зэ­пеуэ Iыхьэхэм теухуауэ ди ­гуп­сысэ щызэтемы­хуаи щы­Iэщ, - жиIащ Мэремкъул Ларисэ, ныбжьыщIэхэм защы­хуигъазэм. 
Къардэн Марат марафон зэпеуэм ехъулIэныгъэ къы­щызыгъэлъэгъуахэм ехъуэ­хъуащ, адыгэбзэр фIыуэ зэралъагъум хуэдэу, адэкIи щIэныгъэм и лъагъуэм гуш­хуауэ ирикIуэну чэнджэщ ­яритащ. Абы Зэгъэщтокъуэ Людэ фIыщIэ хуищIащ Iуэ-хур къызэрызэригъэпэщам, щIэб­­лэм къызыхэкIа лъэп­къыр фIыуэ ялъагъуу къыдэ­кIуэтеиным хуищI хэлъхьэныгъэм папщIэ. 
Зэпеуэм хэта гупым видео­зэпыщIэныгъэкIэ чэзур иратащ Тэрч щыналъэм хиубыдэ Тамбовкэ къуажэм и ныбжьыщIэхэм. Иджы абы къы­щызэрагъэпэщынущ Що­джэн­­­цIыкIу Алий теухуа зэ­пеуэ. 

Тхыгъэри сурэтхэри ГУГЪУЭТ  Заремэ  ейщ.