Самарада «Россей – спортну къыралы» онючюнчю форум бардырылгъанды. Анга 58 къыралдан 5 мингден аслам адам къатышханды.  Ары КъМР-ни Парламентини Председателини орунбасары Мурат Карданов бла республиканы спорт министри Ислам Хасанов баргъандыла, деп билдиредиле КъМР-ни Спорт министерствосундан. 
Форумда «Спорт тамблабыз ючюндю» деген пленар жыйылыу болгъанды. Аны кезиуюнде тийишли спорт ведомстволаны башчылары бла министрле спортну айнытыуну, бу жаны бла халкъла аралы байламлыкъланы кючлеуню амалларын сюзгендиле. Жыйылгъанланы алгъышлай, къыралны Президенти Владимир Путин адамла, саулукъларыны халларына бла жыл санларына къарамай, жарау эталырча асламлы спортну бютюн кенг жайыу, сабийлени бла жаш тёлюню спорт бла кюреширге кёллендириу Россейни айнытыуну миллет борчларындан бири болгъанын белгилегенди. 
Ызы бла «Солидарность Самара Арена» стадионда уллу кёрмюч къуралгъанды, анда Ата журтлу спортда болдурулгъан жетишимле, жангычылыкъла бла арт кезиуде жарашдырылгъан технологияла кёргюзтюлгендиле. Владимир Путин адаптив спортдан Россейде биринчи кёрмюч-жарыкъландырыу арагъа да къарагъанды, аны майданында уа республикабызны келечилери сокъурланы араларында жангы паралимпиада спортдан – садакъдан атдырыудан – усталыкъларын кёргюзтгендиле. Ол мурат бла къыралны Паралимпиада комитети Самарагъа республиканы Спорт министерствосуну спорт-адаптив школуну башчысы Александр Кулюшинни бла СВО-ну ветераны, къазауатны кезиуюнде жаралы болгъан Заурбек Мазлоевни чакъыргъанды. Кёзлерине байлау салыннганлыкъгъа, садакъдан жаздырмай атдыргъаны бла Заурбек жыйылгъанланы сейирге къалдыргъанды эмда Президентни махтаууна тийишли болгъанды.
Алай бла Владимир Путинни буйругъу бла адаптив спортдан кёрмюч-жарыкъландырыу арала къыралны битеу субъектлеринде да ачыллыкъдыла. Аланы къураугъа  Паралимпиада комитет бла «Саулукълу Ата журт» жамауат къымылдау къошумчулукъ этерикдиле.

Кульчаланы Зульфия