Мы бжьыхьэ махуэхэм Налшык къалэм и НыбжьыщIэ ­театрым и гупэм къит Свободэ жыг хадэ цIыкIур таурыхъым и дуней телъыджэми ярейт. Абы щагъэлъэпIащ къэбым и махуэр. Зэхыхьэр къызэрагъэпэщащ «Деловая Россия» IуэхущIапIэм и щIыналъэ ­къудамэм и щIалэгъуа­лэ гу­пым, къалэ администрацэмрэ къалэм зегъэу­жьы­­нымкIэ «Платформа» институтымрэ и дэIэпы­къуэгъуу. 

Гукъыдэж яIэу зэхыхьэ ­гуапэм зрагъэхьэлIащ къалэдэсхэмрэ абы и хьэщIэхэм­рэ, унагъуэ-унагъуэкIэрэ зэ­гъусэу абы екIуэлIаи яхэту. ­Театр щIыхьэпIэри, дэкIуеипIэ­ри, Iэгъуэблагъэри ягъэдэхат зи инагъ-цIыкIуагъкIэ зэщхьэ­щыкI къэб зэмыфэгъухэмкIэ. 
Къэбым къыхэщIыкIа шхы­ныгъуэхэмрэ псыIэфIхэмрэ хьэуам хэтт, я мэ гуакIуэр зыхыумыщIэнкIэ Iэмал имыIэу. Сабийхэм я IутIыжт: дэнэкIи я дыхьэшх макъыр къыщыIурт; цIыкIухэм къыхузэрагъэпэща мастер-классым зэрыджэгу хьэпшыпхэр щагъэхьэзырырт; языныкъуэхэм я нэкIухэм ­художникхэм къэбым и сурэт трагъэщIыхьырт, адрейхэр къэб теплъэ зиIэ шашкэкIэ джэгурт.
- Хуабжьу си гуапэщ мы жэрдэмыр си лэжьэгъухэми «Платформа» институтми къызэрыздаIыгъар, - жеIэ илъэс етIуанэ хъуауэ махуэшхуэр зи жэрдэм Блий Залинэ. - Ар къыщIэзгупсысам и щхьэусыгъуэр къэбыр фIыуэ зэрыслъагъурщ, варенэ, джем, IэфIыкIэ жыпIэми, абы шхыныгъуэ зэмы­лIэужьыгъуэхэр къызэрыхэс­щIыкIырщ. А псом къыдэкIуэу къэбыр бжьыхьэм и плъыфэщ, и дамыгъэщ. Ар икIи къэуат зыщIэлъ шхыныгъуэ зэгъщ, и теплъэкIи зэкIужщ. Аращ зы щIэщыгъуэ гуэр къэзгуп­сы­сыныр къызыхэкIари. 
Блийм дыщIигъужащ, жармыкIэ къудей мыхъуу, уна­гъуэхэм зыщагъэпсэху, я нэгу зыщрагъэужь зэхыхьэ къы­зэригъэпэщыным зэры­хущIэ­къуар. Зэхуэсахэр Залинэ ипщэ­фIа шхыныгъуэхэм я IэфIагъыр зыхуэдэм еплъхэрт, шей, кофе щIыгъуу. 
Зэхыхьэм къыщызэрагъэпэща дэтхэнэ зы мастер-классри зытеухуар къэбырт: абдеж цыкIэ щызэIуащэрт къэбым и теплъэр, сурэт щащIырт, къэб ­теплъэ зиIэ, удз гъэгъахэм ­папщIэ кумбыгъэхэр гипсым къыщыхащIыкIырт, «къэб» бра­нычхэр ягъэхьэзырырт, къэбхэм IэплIэ ирашэкIыурэ сабийхэми балигъхэми сурэтхэр зытрагъэхырт, языны­къуэхэм унэм здахьырт. 
Мы зэхыхьэм насыпырыхь джэгуи къыху­зэрагъэпэщат, мастер-класс­хэм хэта хьэ­щIэ­хэмрэ абыхэм щагъэхьэзыра хьэпшыпхэр къэзыщэхухэмрэ папщIэ. 
Прохладнэм щыщ, мастер-класс зыта Гаевэ Татьянэ жиIащ Iуэхум хэтхэм «Деловая Россия» хьэрычэт школыр къызэраухар, хьэрычэтыщIэ щIа­лэгъуалэм я зэфIэкI ягъэ­лъэгъуэну «къэбым зэрызэ­хуишэсар», хьэжыгъэм къыхищIыкIа «къэбыр» зи насып текIуэм тыгъэ хуищIыну зэримурадыр. 
«Деловая Россия» хьэрычэт школым и щIалэгъуалэ гупым щыщ Ерчэн Олеси я насы­пырыхь джэгум и саугъэтхэр зыхуэдэр жиIащ: языныкъуэ­хэм варенэ банкIхэр, адрейхэм Тыркум зэрызыщагъэпсэхуну путёвкэхэр къапэплъэрт. 
Махуэшхуэм балигъхэми сабийхэми зыщагъэпсэхуауэ, Iуэ­хур къыхэзылъхьахэм фIы­-  щIэ хуащIу зэбгрыкIыжащ.

ТЕКIУЖЬ Заретэ.