Къабарты-Малкъарда «Жашау этерге инфраструктура» миллет проектге кёре  жолла тап эм къоркъуусуз болурча аслам иш этиледи. Ол санда бу кюнледе  «Биринчи Лескен- Огъары Лескен – Ташлы-Тала – Хазнидон» жолну юч километр кесегин  жангыртып бошай турадыла, деп билдириледи КъМР-ни Транспорт эмда жол мюлк министерствосуну пресс-службасындан.

Жол Ташлы-Таланы ара орамына къошулгъаны себепли элчилеге бютюн магъаналыды.  Мында   мектеп, садик,  фельдшер-акушер пункт, элни  администрациясы, почта дегенча социал магъаналы объектле орналадыла. 

Бюгюнлюкде подряд организация ишлени кёбюсюн тамамлагъанды. Ол санда жолну мурдорун кючлеп, жауун суу саркъырча арыкъла бла быргъыланы жарашдырып бошап биринчи къат асфальт жайгъанды. Адамлагъа таплыкъгъа тротуар  ишленнгенди,  кече жарыкъ болурча чыракълы чыпынла  да салгъандыла. Бу кюнледе  асфальтны экинчи къатысын да жайып башлагъандыла, аны бла бирге кёпюрню да тап халгъа келтирип кюрешедиле.

Саулай алып айтханда, жолну къурамы къыйын хауа болумгъа эм ауур жюк ташыгъан машиналагъа да иги кесек заманны  тёзерча  боллукъду.  

Ишлени ахырында къоркъуусузлукъну жалчытырча темир буруула тартыллыкъдыла.   Жорукъну билдирген белгиле бла ызла да жерлерин табарыкъдыла. 

Магометланы Сулейман.