Быйыл жылны башындан бери Нальчикде жашагъанла хайырланнган электрокюч ючюн "Россети Северный Кавказ» - «Каббалкэнерго» биригиуге  6,8 миллиард  сом тёлегендиле.  Былтыр бу  заман тенглешдиргенде, ол 950 миллион сомгъа кёпдю.  Алай бла сагъынылгъан кезиуде тёлеулени ёлчеми 88 процентге жетгенди, деп билдириледи  «Россети Северный Кавказ» биригиуню  пресс-службасындан.

 Бюгюнлюкде биригиуню Нальчикде бёлюмю ток бла 95,4 минг абонентни жалчытады. Аланы асламысы, неда 93,2 проценти,  болжалдан кеч къалмай, тёлерге ашыгъадыла.  Ол санда республикалы эм жер-жерли бюджетледен ахча тёленнген организацияла бла  учрежденияла борчларын да санап - 101, промышленный эм  аллай болмагъан предприятияла - 100, эл мюлк производительле - 99 эм энчи иелиле да 97 процент чакълы  тёлегендиле.

Бирси жыллада, быйыл да ток ючюн уллу борчлары болгъанла жашау-журт эм коммунал мюлк предприятияладыла. Сагъынылгъан кезиуде ала ток ючюн 30 процентни  тёлегендиле. 

Энергетикле  кёп заманн тёлемегенледен ахча алырча 965 миллион сом багъасына сюдлеге  698 иск бергендиле.

Эсге сала айтсакъ, ток бла жалчытхан компанияны бёлюмюне барыргъа онглары болмагъанла аны   телефонларында  «Свет Онлайн» приложение бла тамамларгъа боллукъдула.  Ол кимге да тап болурча амалды. Аны себеплиги бла комиссиясыз тёлерге, эсеплеген приборда ненча санагъанын жиберирге, къайсы айда къаллай бир берилгенине  квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.

 «Россети Северный Кавказ»-«Каббалкэнерго» биригиуню келечилери токну къаллай бир саналгъанын айны 23-26 кюнлеринден кеч къалмай жиберирге эм тёлеулени уа айны онусуна дери этерге кереклерин эсге саладыла.

Эки ай чакълы тёлемеген инсанны биригиу ток ыздан кесерча эркинлик бериледи. Андан сора да, кёп заманны тёлемей, борч этип тургъанла игилик бла ангыламасала, аланы закон бла жууапха  тартырча онг барды. Аллай амаллагъа ишлерин сюдге бериу, токну хайырланалмазча чек салыу киреди. Уллу кёллюлюк этгеннге,  борчундан тышында, тазир тёлерге да тюшерикди. 

- Заманында тёлегенлени санына къошула баргъаныны баш сылтауларындан бирлерине – жамауат бла тири билдириу, ангылатыу иш бардырылгъанын, арт заманда абонентле электрон амалны   да тири хайырланнганларын санарчады,- деп  билдиредиле "Россети Северный Кавказ» - «Каббалкэнерго» биригиуде.

Курданланы Сулейман.