Бахъсэн районым и къуажэхэм физкультурэмрэ спортымрэ зыщегъэужьыным ехьэлIауэ щIыналъэ администрацэм лэжьыгъэ пыухыкIахэр иужьрей илъэсхэм ирегъэкIуэкI, жылэхэм щыпсэухэр  спортым дегъэхьэхын, ахэр узыншэу  псэун папщIэ.

ЖыпIэнурамэ, абыхэм ящыщ зыщ Бахъсэненкэ къуажэм иджыблагъэ къыщызэIуаха, спорт джэгукIэ куэдым хуэщIа щIыпIэшхуэр. НобэкIэ, ди республикэм абы хуэдэ ухуэныгъэ щыIэкъым. Ар яухуащ «Къуажэ щIыпIэхэм сыт и лъэныкъуэкIи зегъэужьын» къэрал программэм ипкъ иткIэ икIи псори зэхэту метр зэбгъузэнатIэу 800 ирагъэубыдащ абы, зыхуей-зыхуэфIхэмкIи нэсу къызэрагъэпэщащ.

Иджы бахъсэненкэдэсхэм яIа хъуащ футбол «цIыкIу», баскетбол, волейбол, стIолыщхьэ теннис ущыджэгун, абыхэм зыщыхуэбгъэсэн губгъуэхэмрэ щIыпIэхэмрэ, иджырей «алэрыбгъухэр» ахэм ярыдзыжауэ. Абы нэмыщI, гимнастикэм хуэщIа Iэмэпсымэхэр, турникхэр, нэгъуэщIхэри щагъэуващ абдежым. А псом къадэкIуэу, цIыху куэд а щIыпIэм къызэрекIуэлIэнум къыхэкIыу, машинэ гъэувыпIэ ящIащ, и инагъкIэ метр зэбгъузэнатIэ 350-рэ хъууэ.

Бахъсэн щIыналъэм и спорт инфраструктурэр егъэфIэкIуэным ехьэлIауэ екIуэкI лэжьыгъэхэм я зы Iыхьэу аращ ар, щыжаIащ щIыпIэ администрацэм. Псалъэм къыдэкIуэу, пэхуэщIэ зыбжанэ районым щагъэзэщIащ иужьрей илъэсхэм. Абы хохьэ Псыхъурей къуажэм дэсхэр яфIжфIу зэкIуалIэ, физкультурэ-узыншагъэр щрагъэфIакIуэ комплексыр (ФОК), гимнастикэм хуэщIауэ, щIыбым зыщыбгъэсэну, Ислъэмей, Къулъкъужын Ипщэ, Зеикъуэ, Бахъсэненкэ жылэхэм щаухуа спорт утыкухэр. Абы нэмыщI, Бахъсэненкэ къуажэм ФОК-щIэ щIыным щыщIадзащ.

Районым спорт ухуэныгъэщIэхэр зэрыщащIым къадэкIуэу, мыдрей щыIэхэри къагъэщIэрэщIэж зэпытщ. ЖыпIэнурамэ, Кыщпэк къуажэм и курыт еджапIэм къедза топджэгу губгъуэр, IэрыщI алэрыбгъу зэрылъыр, къызыхуэтыншэу нэгъабэ зэрагъэпэщыжащ. Абы нэмыщI, бюджетым хэмыхьэ мылъкукIэ, къуажапщэмкIэ щыIэ топджэгу губгъуэр зыхуей хуагъэзащ: къэухьхэр зэрахъуэкIащ, гъуэхэр зэрагъэпэщыжащ, топджэгу губгъуэр зэтес ящIащ. Иджыпсту ирагъэкIуэкIыну къапэщылъ лэжьыгъэхэм къызэрыщыгъэлъэгъуамкIэ, футбол «цIыкIум» хуэщIа губгъуи а къуажэм щаухуэнущ. Апхуэдэуи щIыпIэ администрацэм игъэхьэзыращ ФОК-щIэ Кыщпэк щыухуэным ехьэлIа проект-дэфтэрхэр.

«Бахъсэн щIыналъэм и спорт инфраструктурэм зегъэужьыныр пыщIащ ди цIыхухэм я псэукIэр егъэфIэкIуэныр. Иджырей мардэм къитIасэ спорт ухуэныгъэхэр къызэдгъэпэщкIэрэ, цIыхухэм я узыншагъэр зэредгъэфIакIуэм имызакъуэу, къытщIэхъуэ щIэблэр худогъасэхьэл мыхъумыщIэхэм зыщадзеиным икIи абы щхьэкIэ щыIэ Iэмалхэр къыдогъэсэбэп», - жиIащ Бахъсэн район администрацэм и унафэщI Балъкъыз Артур.

ХЬЭЩЫКЪУЕЙ Олег.