КъМР-ни Парламентини Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетни кенгертилген жыйылыуунда уучулукъ бла байламлы сорууланы бир низамгъа келтириу эм уучу хазнаны аяулу хайырланыуну онглары сюзюлгендиле.  

Комитетни башчысы Артур Текушев, жыйылыуну ача, сюзюлген сорууну магъаналылыгъын чертгенди. Ол уучулукъ бла байламлы жумушланы битеу сейирлери болгъан органла бирге тамамларгъа керек болгъанларын белгилегенди. 
Парламентни башчысыны орунбасары Жанатайланы Салим бу соруу законла чыгъарыучу органда биринчи кере сюзюлгенине эс бургъанды, ол себепден ачыкъ ушакъ бардырыргъа чакъыргъанды. 
Уучулукъда болумну юсюнден КъМР-ни табийгъат байлыкъла эм экология министрни орунбасары Аслангери Табухов билдиргенди. Ол айтханыча, регионда уучулукъ жерлени кенглиги  870 минг гектаргъа жетеди.
Жылны аллында кийик жаныуарланы эм ала отлагъан жерлени хайырланыуну сакълау эм федерал надзор тамамлау жаны бла департамент уучу жерлени къырал эсепге алыу жумушла бардырады. Бу мадарла энчи сакъланнган табийгъат жерледе этилмегенлерин чертгенди докладчы. Алагъа кёре ууну къаллай бир жерде бардырыргъа жарагъаны тохташдырылады. 
Белгили этилгенича, республикада кавказ жугъутургъа уугъа 2024-2025 жыллада чекле кийирилгендиле - 170 малдан кёбюсюн ёлтюрюрге жарамайды. Андан сора да къояннга, тюлкюге, бёрюге, къабаннга уугъа барыргъа эркин этиледи. Бу кезиуде уучулукъ бла кюреширге 2800 эркинлик берилгенди.
Былтыр республиканы районларында уучу мюлкледе 1200 тинтиу бардырылгъанды, аланы кезиуюнде 64 административ бузукълукъ ачыкъланнганды. Битеу да бирге 118 минг сом тазир салыннганды. Дагъыда этилген къоранчла къайтарылып, къыралгъа 183 минг сом тёленнгенди.   
Сёз КъМР-ни Къызыл китабын хазырлау жаны бла ведомствола аралы комиссияны ишини, къоншу регионла бла байламлыкъланы, кийик малланы ёлюклерин излеу жаны бла мадарланы юслеринден баргъанды.
Докладчы билдиргенича, былтыр тонгузланы эминасын ачыкълар мурат бла – 37, силегейни излеу жаны бла да 26  тинтиу къуралгъанды. Ауруу ачыкъланмагъанды. 
Уучу мюлкледе биотехника мадарла, жаныуарланы сакълау жумушла заманында толтурулады. 2011 жылдан бери министерство уучулагъа федерал излемлеге келишген билетле бергени да айтылгъанды. Былтыр 1251 билет берилгенди.
Кемчиликлени юслеринден баргъанды сёз. Къырал инспекторла жетмегенлерини  хатасындан уучу мюлкню сакълау борчланы толтурууда кемчиликле бардыла, браконьерлеге къажау иш кереклисича бардырылмайды 
Сюзюлген соруугъа кёз къарамын Аграр соруула, табийгъатны хайырланыу, экология эм тёререкдеги къудуретни сакълау жаны бла комитетни башчысыны орунбасары Сафарби Шхагапсоев да билдиргенди. 
Докладланы сюзе, депутатла кийик малланы сакълау мадарланы игилендириуню, жууаплы органланы араларында хайырлы байламлыкъла къурауну юслеринден айтхандыла. 
 Жыйылыу эсгертиулени къабыл кёрюу бла бошалгъанды.

КъМР-ни Парламентини пресс-службасы