Алгъаракълада «Ата журтну къоруулаучулары» фондну Къабарты-Малкъарда бёлюмю бла «Жулдузчукъ» санаторий энчи аскер операциягъа къатышханланы сабийлери саулукъларын кючлерча программаны бардырыргъа келишген эдиле, деп билдиргендиле КъМР-ни Саулукъ сакълау министерствосуну пресс-службасындан.
Бюгюнлюкде аны чеклеринде оналты адам реабилитацияны ётедиле. Саулай алып айтханда, тийишли болушлукъ жюз бла жарым чакълы сабийге тапдырыллыкъды. Аланы хар бирине да энчи программа жарашдырыллыкъды эм жыйырмадан артыкъ кюнню багъылырча мадар этилликди. Ол санда тенглеринден артха къалмаз ючюн, дерсле да берилликдиле. Окъуудан тышында жарыкъландырыу, маданият эм башха затладан сагъатла да ётдюрюллюкдюле.
Эсге сала айтсакъ, Долинскдеги «Жулдузчукъ» санаторийде сынамлы специалистле урунадыла. Ала сабийлеге ёз балаларынача къарайдыла эм хар бирине энчи эс бурадыла. Школчула мында, саулукъларын кючлегенден тышында, окъургъа эм заманларын зауукълу ётдюрюрге да онг табадыла.