КъБР-м и Iэтащхьэ КIуэкIуэ Казбек щыIащ Республикэ клиникэ сымаджэщым дохутырхэм я дэIэпыкъуэгъу хуэныкъуэхэр зрашэлIэну и къудамэщIэм икIи щыгъуазэ зищIащ абы щрагъэкIуэкIа лэжьыгъэхэм. Махуэ гъунэгъухэм абы лэжьэн щIидзэнущ. Илъэгъуахэм я гугъу КъБР-м и Iэтащхьэм щещI интернетым щиIэ напэкIуэцIым.
«КъудамэщIэр ящыщщ икIэщIыпIэкIэ дэIэпыкъуэгъу хуэныкъуэхэм защIэгъэкъуэным теухуауэ щIыналъэм иIэ IуэхущIапIэ нэхъыщхьэхэм.
Метр зэбгъузэнатIэ мин 1,2-рэ зыубыд IуэхущIапIэр Iыхьищу гуэшауэ щытщ, сымаджэхэм я щытыкIэм елъытауэ къащыдэIэпыкъун хуэдэу.
Къудамэм иIэщ сымаджэм пкърыт узыфэр щызэхагъэкI пэшхэр: УЗИ, рентген, компьютер томографие, эндоскопие къэпщытэныгъэхэр щрагъэкIуэкIхэр, уIэгъэхэр щапхэ, гужьеигъуэм зэщIиIулIахэр а щытыкIэм къыщраш, операцэ щащI пэшхэр. Абы Iэмал къитынущ сымаджэхэм зыхуей дэIэпыкъуныгъэр нэсу ягъуэтынымкIэ.
КъимыдэкIэ, нэхъ тынш хъуащ цIыхухэр сымаджэщым и адрей унэхэм гъэIэпхъуэнри. Абы папщIэ ахэр щIыбым щIашынукъым, щхьэ зытелъ зэпрыкIыпIэ яIэ зэрыхъуам и фIыгъэ- кIэ.
Къэбэрдей-Балъкъэрыр ящыщщ къэралым и щIыналъэхэу икIэщIыпIэкIэ дэIэпыкъуэгъу цIыхухэм ягъуэтыным хуэгъэза иджырей Iэмалхэр псом япэу щызэтезыухуахэм.
Шэч къытесхьэркъым а зэхъуэкIыныгъэхэр медицинэ дэIэпыкъуэгъу псынщIэу икIи фIагъ лъагэ иIэу цIыхухэм етыным хуэгъэза къалэнхэр гъэзэщIэнымкIэ, ди республикэм щыпсэухэм я гъащIэмрэ узыншагъэмрэ хъумэнымкIэ сэбэп зэрыхъунум», - етх КIуэкIуэ Казбек.
