Искусстволаны Шимал-Кавказ къырал институтунда Право низамны сакълаучу органлада къуллукъларын толтура ёлгенлени эсге тюшюргендиле. Анга жораланып мында «Сиз этген кишиликни унутмагъанбыз» деген ат бла «тёгерек стол» ётгенди. Аны «Патриот» жамауат организация «Тарых магъаналы эсгериуле» деген проектини чеклеринде къурагъанды.
Жыйылыугъа Нальчик шахарны прокуроруну тамата болушлукъчусу Мурат Мамбетов, институтну преподаватели Мадина Кулова, КъМР-де «Патриот» жамауат биригиуню келечилери Алим Апшев бла СКГИИ-ни профессору Эфендиланы Фуад да къатышхандыла.
Мурат Мамбетов 2005 жылны 13 октябринде болгъан ишлени эсгере, былай дегенди: «Андан бери жыйырма жыл озгъан эсе да, ол заманда салыннган ачы жара энтта да сынтыл болмагъанды. Ол кюн право низамны сакълаучулагъа артыкъда уллу бушуу сынаргъа тюшгенди, аладан мамыр жашауубузну къоруулай кёпле ёлгендиле. Бандитле, алагъа башхача айтыргъа болалмайма, ол кюн Ич ишле министерствогъа, милициячыланы Нальчикде болгъан юч бёлюмлерине, ФСБ-гъа, чекчи отрядлагъа да чабыууллукъ этип, республиканы ырахатлыгъын бузаргъа, халкъын къоркъутургъа умут этгендиле, алай право низамны сакълаучу органлада къуллукъ этгенле, аскерчиле, тиширыула окъуна аланы алларында къалкъан болуп сюелгендиле. Ол кюрешде кёплени жашаулары юзюлгенди, аланы атлары бир заманда унутуллукъ тюйюлдю».
Мадина Кулова уа, ол кюнню эсгере, аллай кюн къайтарылмаз ючюн, къолубуздан келгенни аямазгъа керкбиз, дегенди. Ол кюнле къайтмасынла, аланы мындан ары киши да сынамасын»,– дегенди Мадина.
Алим Апшев да терроризмге, экстремизмге къажау уллу, гитче да бирден сюелирге кереклисин, ол осал ишлени жаланда биригип хорларгъа боллугъун чертгенди.
Эфендиланы Фуад терроризмге бла экстремизмге къажау кюрешде битеу кючлени бирикдирирге чакъыргъанды. «Бириксек, къаллай аманлыкъны да хорлаяллыкъбыз. Къыралыбызда, бютюнда бег а республикабызда, кёп миллетлени келечилери, тюрлю-тюрлю динлени тутханла ёмюрледен бери да келишиулюкде жашагъаныбызны эсде тутаргъа керекбиз. Биз бир халкъбыз, алай эсе уа, къыралыбызны тынчлыкълы жашауу ючюн хар ким да къолдан келгенни этерге борчлуду», – дегенди.
Жыйылыуну кезиуюнде тарых магъаналы документле да окъулгъандыла, жаш адамла кеслерин къаллай болумлада къалай жюрютюрге кереклисини, республикада мамыр жашау сакъланыр ючюн не этилгенини юсюнден да айтылгъанды.
Ахырында тёгерек столгъа къатышханланы барысы да къуллукъ борчларын толтура ёлгенлени бир минутну шош сюелип эсгергендиле.
АДИЛОВА Л.
