Къабарты-Малкъарда «Жашау этерге инфраструктура» миллет проектге кёре туризм объектлеге баргъан жолла тап эм къоркъуусуз болурча аслам иш этиледи. Бу жаны бла уллу эм магъаналы проектледен бирине «ЭкинчиЧегем – Булунгу» жолгъа тынгылы ремонт этилгенин санаргъа боллукъду. Ол 2022 жылда башланнганды, аны кезиуюнде 64 километр жангыртыллыкъды, деп билдириледи КъМР-ни Транспорт эмда жол мюлк министерствосуну пресс-службасындан.

Бюгюнлюкде специалистле Чегем чучхурланы бла Булунгуну эм Эл-Тюбюню арасында жолну 25 километр кесегин игилендирип кюрешедиле. Ол санда жолну мурдорун кючлеп. Жауун, суу саркъырча быргъыла, арыкъла салып, жардан таш, топуракъ оюлмазча, черек жагъаларын суу таламазча бетондан хунала къуюп кюрешедиле эм биринчи къат асфальт салгъандыла. Жылны ахырына дери жолну мурдорун кючлеп, биринчи къат асфальт жайып бошаргъа умутлары барды. Аны бла бирге къоркъуусузлукъгъа да аслам эс буруллукъду, темир буруула тартыллыкъдыла эм башха тийишли жумушла да тамамланырыкъдыла.

Андан сора да, жылны ахырына дери 200 метр чакълы бирде тогъуз кёпюр жангыртыллыкъды. Алгъаракълада аланы алтысында къурулуш ишле бошалгъандыла. Бусагъатда  Чегем сууда кёпюрню  сюеп бошай турадыла. Аны бла бирге  Чегем эм  Жуууннгу сууланы кёпюрлерини къурулушлары да къыстау  барады.

Саулай алып айтханда, объектле  быйылдан  кеч къалмай хайырланыргъа берилирге керекдиле.

Магометланы Сулейман.