Кёп болмай Битеу Россей халкъ фронтну (ОНФ) Къабарты-Малкъарда бёлюмюне Нальчикде жашагъанладан бир къауум адам   сёлешип,  Осетин орамда темир жол вокзалны къатында   улоу тохтагъан жер мардалагъа келишмегенин айтып тарыкъгъандыла. 

Сагъынылгъан жерде кёп заманны ичинде  жангы излемлеге келишген остановка болмагъаны бек сейирди. Нек дегенде  ол темир жол вокзалны -    Нальчикни "къабакъларыны" аллында орналады.     
Жамауатчыла жерине барып къарагъанларында,  кертиси бла да, улоу тохтагъан жерде, тийишли белгиден сора,  башха зат  кёрмегендиле. Былайда уа кюннге жамауат транспортну сакълагъан   жюзле бла пассажирле сюеледиле.  Аны себепли шахарчылагъа эм къонакълагъа да бирде исси кюнню неда сакъ жауунну тюбюнде сакъларгъа тюшеди.

Былтыр ОНФ-ну келечилери  объект бла байламлы тарыгъыуну шахарны администрациясына  билдиргендиле, болсада анда  улоу тохтагъан павильон ишлерча ахча жетмегенин айтхандыла. Андан сора да, Республикагъа оноу этиу жаны бла арагъа (ЦУР) бир къауум кере билдирилгенди. Мында да  бир тюрлю жууап берилмегенди. 

Бу жол да  жамауатчыла Нальчик шахар округну администрациясына тынгылы эм къоркъуусуз комплекс ишленирча  бир мадар этилирин  жазып жибергендиле.  Бюгюнлюкде къаллай жууап берилирин  сакълайдыла. Болсада болум иги жанына тюзелир деп уллу ышаныулукъ барды.

Магометлны Сулейман.