Бюгюнлюкде  Нальчикде «Узакъ ёмюр эм тири жашау бардырыу» миллет проектге кёре къыстау жангы излемлеге келишген   Онкология диспансерни къурулушу барады.   Ол ишлеп башласа, саусузла  бийик технологиялы болушлукъ алыргъа онг табарыкъдыла, деп билдириледи Къурулуш эмда жашау журт-коммунал мюлк министерствосуну пресс-службасындан.

Айтханыбызча, проект санитар-эпидемиология мардалагъа бла излемлеге келиширча тюрлендирилгени себепли жарты ишленип къалгъан объектни талай жерлерин оюп кетерирге эм кенгертирге тюшгенди.   Жангы диспансерни уллулугъу 24 минг квадрат метрге жетерикди. Ол  кёп къатлы беш  багъыу  блокладан къураллыкъды. Барында да саусузлагъа 250 жер боллукъду. Дагъыда бир сменнге жюз адамгъа къарар онглары болгъан поликлиника да ачыллыкъды. Мында лучевой, химиотерапия, хирургия эм кюндюз жатханлагъа багъарча стационар да  боллукъду.

Аны хирургия корпусуну  экинчи  къатында  эндоскопия,  фотодинамика  диагностика эм терапия бёлюмле ишлерикдиле. Аланы хайыры бла аурууну башлана тургъан кезиуюнде тинтирге онг табыллыкъды.  Ол санда аш орунлары бла чегилери ауругъанланы да.

Радиология  блокда  лучевой терапия бла  опухольгъа радиация этип  багъарыкъдыла. Андан сора да, радиоэмболизация да этилликди. Аны кезиуюнде радиациялы материалны къан тамырла бла ауруу къозгъалгъан жерге   жиберликдиле.

Саулай алып айтханда,  жангыртылгъан медицина арада онкология бла байламлы аурууланы къайсы бирине да багъарча мадар этилликди. Бюгюнлюкде планда   белгиленнгенича,  корпусланы барысы да сюелтилиннгендиле.

Алада тыш къабыргъаларын сюртюп эм  ичлеринде жумушла бла кюрешедиле. Ол санда ток чыбыкъланы, жылыу берген системаны, таза эм кир суу баргъан быргъыланы тартадыла, вентиляцияны, лифтлени жарашдырадыла, ич къабыргъаларын сюртедиле, бояйдыла эм башха жумушланы да тамамлайдыла.

Проектге кёре, стационар аяулу технологияла амалгъа кёре ишленеди. Аны баш магъанасы саусузгъа тап болурча онг къураргъады.  

Эсге сала айтсакъ, къурулуш ишлени жылны ахырына бошаргъа керекдиле. Келир жылда уа тийишли оборудованияны салып бошарыкъдыла. Алай бла Онкология диспансер хайырланыргъа 2027 жылдан кеч къалмай берилири сакъланады.

Магометланы Сулейман.