«Урушну сабийлери» битеуроссей жамауат биригиуню Нальчикде бёлюмю бу кюнледе жыйылыуун бардыргъанды. Аны таматасы Фатима Курашева, чынг аллын, бу жамауат биригиуню былтырдан бери этген ишлерини юслеринден билдиргенди. Ала уа аз тюйюл эдиле. Шахар тийресинде урушну, урунууну ветеранларына жолугъуп, аланы жарсыуларына тынгылап, къолларындан келгенича болушуп, эсде къаллыкъ майдалла да берип тургъандыла.
Жыйылыугъа КПРФ-ни Къабарты-Малкъарда бёлюмюню таматасы Борис Паштов, Коммунист партияны Нальчикде шахар комитетини биринчи секретары Мурат Мизов, Къабарты-Малкъарда комсомол-пионер къымылдауну таматасы Орусбийланы Елена къатышхандыла.
Ол кюн Нальчикде бла аны тийресинде элледе жашагъан жыл санлары келген кёп адам бар эди. «Ёмюрлени ушагъы» деп  жыйылыу алагъа аталгъан эди. Аланы алгъышлай, Борис Паштов  тамата тёлюню къыралны аллында къыйыны уллу болгъанын чертгенди. «Сизни къыйыныгъыз бир заманда унутуллукъ тюйюлдю» – дегенди.
Андан сора «Урушну сабийлери» биригиуню Къабарты-Малкъарда  бёлюмюню таматасыны орунбасары Евгения Шидакова, КъМР-ни сыйлы журналисти Османланы Хыйса да сёлешгендиле. Ала да уллайгъан къауумну сабийлиги, жашлыгъы да  болмагъанын, акъылбалыкъ болгъунчу окъуна урунургъа тюшгенин айтып, ыспас этгендиле, узакъ ёмюр тежегендиле. Османланы Хыйса уа абаданлагъа жораланнган «Жашау» деген назмусун орус тилде окъугъанды.
Ызы бла къауум абаданнга КПРФ-ни Ара комитетини «Хорламгъа – 80 жыл» майдаллары берилгендиле. Саугъаланнганланы араларында Акъ-Суудан Гайыланы Шамшюдюнню жашы Темирбек да бар эди. Ол эрттеден бери да кёп жерледе уруна келгенди. Жамауат ишге да тири къатышады. Къауум кере  Нальчикни шахар Советине депутатха айырылгъанды. Бюгюнлюкде да ишин бардырады.
Уллайгъанланы бир къауумуна уа «Урушну сабийлери»  майдалла берилгендиле. Ол саугъаны алгъанланы араларында Улбашланы Афарны къызы Марзият да бар эди. Ол да къыралны аллында уллу къыйыны болгъан адамладан бириди. Бюгюнлюкде да жамауат ишге  тири къатышады. Майдалны алгъан кезиуде ол: «Ишиме уллу багъа бичип, сый бергенигиз ючюн  жюрек ыразылыгъымы билдиреме», – дегенди.
Саугъаланнганланы Нальчикни 11-чи номерли  мектебини окъуучулары да алгъышлагъандыла. Ала къобуз сокъдула, жырлап, тепсеп, назмула айтып да, жыйылгъанланы къууандыргъандыла. 

Лейлун улу Х.