КъМР-ни Парламентини президиумуну жыйылыуун спикер Татьяна Егорова бардыргъанды. Анда эллиге жууукъ соруугъа къаралгъанды.

«2026 жылда КъМР-де урунуу рынокну энчиликлерин белгилеген коэффициентни ёлчемин тохташдырыуну юсюнден» законну проекти сюзюлгенди. Урунуу, социал политика, саулукъ сакълау, ветеранланы ишлери жаны бла комитетни башчысы Хусейн Кажаров айтханыча, законопроектни Правительство бергенди. Тыш къыралланы инсанларыны КъМР-де уруннган бир-бир къауумларына коэффициент 3,3 ёлчемде тохташдырылгъанды.

– Былтыр бла тенглешдиргенде, ол 0,3 пунктха кёбейтилгенди, ол а тыш къыралладан иш излеп келгенлени санын азайтыугъа бурулупду. Алай бла урунуу рынокда ышаннгылылыкъ сакъланырыкъды эмда кесибизни адамларыбызны иш бла жалчытыргъа онг берликди. Аны бла бирге республикада ишлеген тыш къыраллыла тёлеген налогну ёлчеми да ёсерикди, - дегенди депутат.

Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетни башчысы Артур Текушев «Агъач бла байламлы болумланы бирге келишдириуню юсюнден» законнга эмда «Жерлени мелиорациясыны юсюнден» законну 15-чи статьясына тюзетиулени кёргюзтгенди. Ала федерал излемлеге келишдирилгендиле.

Жыйылыуда федерал законланы проектлерине эсгертиуле тинтилип, къабыл кёрюлгендиле. 

Парламентарийле федерал законлагъа да къарагъандыла. Алада инсанланы бир-бир къауумларына социал къоруулауну гарантияларыны, мюлк бла байламлы халланы, энчи сакъланнган табийгъат жерлени, уучулукъну эмда череклени сакълауну юслеринден барады сёз. Дагъыда РФ-ни Налог, Суу, Жашау журт, Шахарлада къурулуш бардырыу кодекслерине тюрлениулеге да къаралгъанды. 

Жыйылыуда Карелия Республиканы Законла чыгъарыучу органыны РФ-ни Председателини биринчи орунбасары Д.В. Мантуровха Россей Федерацияны праволу актларына товарланы багъаларын жазгъанда, бир низам кийириуню юсюнден тюрлениуле кийириу жаны бла тилегине да къаралгъанды.

Тюрлю-тюрлю соруула бёлюмде республиканы законла чыгъарыучу органы толтургъан контроль-аналитика жумушланы эсеплери сюзюлгендиле. Къурулуш, жашау журт-коммунал мюлк эм отлукъ энергетика комплекс жаны бла комитетни башчысы Заурбек Кумалов «КъМР-де кёп къатлы юйлени тынгылы жангыртыуну регион оператору» коммерциялы болмагъан фонд кёп къатлы юйледе тамамлагъан жангыртыу жумушланы «правительстволу сагъатда» тинтгенден сора, чыгъарылгъан эсгертиуле къалай толтурулгъанларын билдиргенди.   

Устазны кюнюне жоралап билим бериуде жетишимли ишлеген инсанланы бир-бир къауумларын КъМР-ни Сыйлы грамотасы бла саугъаларгъа оноу да этилгенди.

КъМР-ни Парламентини пресс-службасыны материалларына кёре Тикаланы Фатима хазырлагъанды.

Тикаланы Фатима.