Кёп болмай РФ-ни табийгъат байлыкъла эмда экология министрини орунбасары Максим Корольков ишчи жолоучулугъуну чеклеринде Къабарты-Малкъарда болгъанды, деп билдиредиле КъМР-ни Табийгъат байлыкъла эмда экология министерствосуну пресс-службасындан.

Максим Владимирович, КъМР-ни Правительствосуну Председателини биринчи орунбасары Сергей Говоров, Запад-Каспий суу управленияны таматасыны болжаллы халда  къуллугъун толтургъан Магомед Рамазанов, КъМР-ни табийгъат байлыкъла эмда экология министри Шауаланы Илияс эм башхала жангыртыллыкъ объектлени жокълагъандыла.

Ала биринчи «Табийгъат байлыкъланы жангыртыу эм хайырланыу» къырал программагъа кёре Бахсан сууну жагъаларын кючлер ючюн этиле тургъан ишлеге къарагъандыла. Белгиленнгенича, ала келир жылдан кеч къалмай бошалыргъа керекдиле. Аны къурулушуна федерал бюджетден 79,5 миллион сом бёлюннгенди.

Ызы бла экспертлени къаууму, Экинчи Чегемни тийресинде Чегем черекни боюнунда да болуп, тёгерек-башха къарагъандыла эм сууну жагъаларын кючлер ючюн къаллай мадар этиллигин сюзгендиле.

Ахырында министрни орунбасары Нальчик сууну боюнунда болум бла да шагъырейленнгенди. Аны жагъаларын кючлеу жаны бла ишле эки кесекден къураллыкълары да белгиленнгенди. Ишле 2027-2030 жыллада бардырыллыкъдыла.

Магометланы Сулейман.