Къабарты-Малкъарны Жарыкъландырыу министерствосуну келечилери министр Анзор Езаовну башчылыгъында Къырал эсеп аттестациялау (ГИА) бла байламлы бардырылгъан регионла аралы кенгешге къатышхандыла. Тюбешиу а Железноводск шахарда озгъанды, ол кеси да Билим бериуде эмда илмуда надзорлукъ этиу федерал службаны башламчылыгъы бла къуралгъанды.
Кенгешни кезиуюнде Шимал-Кавказ федерал округда 2025 жылда ГИА-ны къалай къуралгъанына эмда озгъанына къаралгъанды. Аны бла бирге уа энди келир жолда бардырыллыкъ сынауланы бардырыуну бютюнда тапландырыуну жолларын сюзгендиле.
Тюбешиуге, Рособрнадзорну келечилеринден сора да, Педагогика тинтиулени федерал институту (ФИПИ), Тестированияны бардыргъан федерал ара, РФ-ни регионларында билим бериуде  къырал управленияны толтургъанла, башхала да къатышхандыла.
Жыйылгъанланы алларында сёлеше, къырал аттестация былтыр къалай бардырылгъанын, неге энди бегирек эс бурургъа тийишлисин Рособрнадзорну башчысы Анзор Музаев, Ставрополь крайны билим бериу министри Мария Смагина билдиргендиле.
Тюбешиу а сынауланы къурау эмда бардырыу жаны бла ахшы сынамгъа тюшюнюуню майданына бурулгъанды. Аны бла бирге уа анга къатышханла быллай кенгешлени баш муратлары билим бериуню игилендириу болгъанын эмда ГИА-ны бардырыу сурамлагъа тийишлиликде къуралырына эмда озарына себеплик этеригине толусунлай ышаннганларын билдиредиле.

Трамланы Зухура.